2022թ․-ի սեպտեմբերի 21-ին «Եռաբլուրում» վարչապետ Նիկոլ Փաշինյանի այցի ժամանակ ոստիկանների կողմից բռնության ենթարկված զոհված զինծառայողների ծնողներն այսօր կրկին ՀՀ քննչական կոմիտեում էին՝ բացատրություններ պահանջելու, թե ինչու մինչեւ հիմա հարուցված քրեական գործով չկան պատասխանատվության ենթարկվածներ։ ՔԿ վարչության պետերից մեկի հետ փակ հանդիպումից հետո ծնողները վրդովված էին, ասացին, որ նույն շրջապտույտի մեջ են․ խոստանում են, թե իբր աշխատում են։
«Ո՞ր մեկի հրամանն է սա։ Ոստիկաններից երեքի հետ առերեսում է եղել, ու մեկ ամսից ավելի է՝ ոչ մի տեղեկություն չկա։ Քննչական կոմիտեն հիմա ո՞ւմ հրահանգն է կատարում։ Պետք է պատժվեն այդ կարմիր բերետավորները եւ այդ հրաման տվողը։ Համար մեկ հրաման տվողը եւս պետք է պատժվի։ Մենք այլ կասկածներ ունենք, բայց հիմա եկեք չմանրանանք»,-լրագրողների հետ զրույցում ասաց 2020թ․-ի պատերազմում զոհված Արման Ազատյանի հայրը՝ Վիգեն Ազատյանը։
Թե ինչ են ասել ոստիկաններն առերեսման ժամանակ, ի՞նչ բացատրություն են տվել իրենց գործողություններին, Վիգեն Ազատյանը նշեց․ «Իրենց ասածները հակասում են մեկը մյուսին։ Հիմար պարզաբանումներ են տալիս, թե՝ սխալմունք է եղել, կներեք»։
Վիգեն Ազատյանը կարծում է, որ ՔԿ ղեկավար Արգիշտի Քյարամյանը համարձակություն չի ունենա մեղավորներին պատժելու․ «Կասկած ունենք, որ նա հրահանգ է ստացել այս գործընթացը դադարեցնելու»։
Կարդացեք նաև
Անդրադառնալով Գեղարքունիքի մարզում հրդեհի հետեւանքով 15 զինծառայողի մահվան դեպքին՝ Վիգեն Ազատյանը նշեց․ «Ամեն օր սրանց մնալը բերելու է նման հետեւանքների։ Ե՞րբ ենք սա հասկանալու»։
Լուիզա ՍՈՒՔԻԱՍՅԱՆ
