Անուշ Սերժի Մինասյանի դեմ ներկայացրած հայցից իրավասու մարմինը կհրաժարվի՞, թե՞ ոչ, կքննարկի վերադաս դատախազը: Համենայնդեպս, այսօր Հակակոռուպցիոն դատարանում այդպես հայտարարեց իրավասու մարմնի լիազոր ներկայացուցիչն այն բանից հետո, երբ պատասխանող կողմը ներկայացրեց ժառանգության իրավունքի վկայագրի պատճենն, ըստ որի՝ Ռիտա Ալեքսանդրի Սարգսյանի միակ ժառանգը հանդիսանում է Սաթենիկ Սերժի Սարգսյանը:
Հիշեցնենք, ՀՀ հակակոռուպցիոն դատարանում այսօր տեղի ունեցան ՀՀ երրորդ նախագահ Սերժ Սարգսյանի եւ նրա ընտանիքի անդամների գործով նախնական լսումները: Ըստ հայցադիմումի, Սերժ Սարգսյանի գույքը 38 տոկոսով, իրավասու մարմինը համարում է «ապօրինի ձեռք բերված»:
Հայցադիմումում Սաթենիկ Սերժի Սարգսյանի մասով նշված է, որ 2009 թվականի մարտի 16-ից մինչեւ 2019 թվականի ապրիլի 26-ը աշխատել է առողջապահության նախարարության աշխատակազմում որպես տնտեսագետ եւ այդ ընթացքում նրա եկամուտները կազմել են մոտ երկու միլիոն դրամ: Թվաբանական հաշվարկ կատարելով՝ պաշտպանը պատասխանողի ներկայացուցչին դիմեց. «Ճի՞շտ եմ հասկանում, անձը աշխատել է տասը տարի, ստացել է, ընդհանուր առմամբ՝ երկու միլիոն դրամից մի քիչ պակաս, որը, եթե բաժանում ենք 10 տարիների վրա, ստացվում է 198 գազար դրամ, որը եթե բաժանում ենք 12 ամսվա մեջ, ստացվում է, որ անձն ամեն ամիս ստացել է 16 հազար 500 դրամ աշխատավարձ, որը որ նվազագույնից ավելի պակա՞ս է»:
Կարդացեք նաև
Լիազոր մարմնի ներկայացուցիչն ասաց, որ հայցադիմումում զետեղված են առողջապահության նախարարության, ՊԵԿ տվյալները, որոնք էլ իբրեւ հիմք են ընդունվել: Ապա հավելեց, որ արտադատական փուլում Սաթենիկ Սարգսյանի ներկայացուցիչը հայցադիմումում նշված նյութերի վերաբերյալ առարկություններ չի ներկայացրել, այլապես դրանք վերահաշվարկի տրված կլինեին:
Պատասխանողի ներկայացուցիչը նաեւ հետաքրքրվեց՝ դատախազությունը հաշվի առե՞լ է, որ Սերժ Սարգսյանը 1993 թվականից հանդիսացել է պաշտոնատար անձ եւ օգտվել է այնպիսի արտոնություններից, որոնք թույլ են տվել սպառողական նվազագույն զամբյուղի ինչ-որ մի մաս առնվազն չվճարել, դա հայցադիմումում հաշվի առնվե՞լ է: Դատախազության լիազոր ներկայացուցիչը հայտարարեց, որ դրա ապացույցները ներկայացվեն՝ իրենք հաշվի կառնեն, մինչդեռ վիճակագրական կոմիտեն եւ այլ պետական մարմինները նման փաստեր չեն ներկայացրել: Պատասխանողը նկատեց, որ դա օրենքով սահմանված փաստ է:
Սերժ Սարգսյանի աշխատավարձերին, դրամ-դոլար-ռուբլի հարաբերակցություններին վերաբերվող հարցուպատասխանը՝ տեսանյութում
Նելլի ԳՐԻԳՈՐՅԱՆ
