«Ամերիկայի ձայն». Հունվարի 18-ին Վաշինգտոնում այցով գտնվող Թուրքիայի արտգործնախարար Մևլութ Չավուշօղլուն բանակցություններ է վարել ԱՄՆ պետքարտուղար Էնթոնի Բլինքենի հետ։ Հանդիպումն ընթացել է Թուրքիա-ԱՄՆ Ռազմավարական մեխանիզմի շրջանակում։
Կողմերը քննարկել են երկկողմ հարաբերությունների ողջ օրակարգը, ինչպես նաեւ կարծիքներ փոխանակել տարածաշրջանային թեմաների վերաբերյալ։ Հանդիպման արդյունքում կողմերը հանդես են եկել հանդիպման մասին համատեղ հայտարարությամբ, ուր, մասնավորապես, ասված է.
«ԱՄՆ պետքարտուղար Էնտոնի Ջ. Բլինքենը և Թուրքիայի արտգործնախարար Մևլութ Չավուշօղլուն 2023 թվականի հունվարի 18-ին Վաշինգտոնում անցկացրել են ԱՄՆ-Թուրքիա ռազմավարական մեխանիզմի չորրորդ հանդիպումը։ Պետքարտուղարի քաղաքական հարցերով տեղակալ Վիկտորյա Նուլանդը ևս հանդիպել է Թուրքիայի փոխարտգործնախարար Սեդաթ Օնալի հետ՝ Ռազմավարական մեխանիզմի հանդիպման շրջանակում։ Երկու կողմերը ծավալուն երկխոսություն վարեցին երկկողմ համագործակցության լայն շրջանակի վերաբերյալ և ընդգծեցին գործընկերության նշանակությունը՝ որպես ՆԱՏՕ-ի դաշնակիցներ:
Պետքարտուղար Բլինքենը և նախարար Չավուշօղլուն հիմնվել են 2023 թվականի հունվարի 17-ին Վաշինգտոնում ԱՄՆ պետքարտուղարության և Թուրքիայի արտաքին գործերի նախարարության բարձրաստիճան պաշտոնյաների գլխավորած գործընկերային և միջգերատեսչական քննարկումների վրա։
Կարդացեք նաև
Պետքարտուղար Բլինքենը և նախարար Չավուշօղլուն վերահաստատել են իրենց հանձնառությունը հստակ և արդյունքների վրա հիմնված երկկողմանի դրական օրակարգին։ Նրանք քննարկել են ԱՄՆ-Թուրքիա պաշտպանական գործընկերության ամրապնդումը, ներառյալ Թուրքիայի F-16 ռազմական ինքնաթիռների արդիականացումը:
Պետքարտուղար Բլինքենը և նախարար Չավուշօղլուն ընդգծել են իրենց միանշանակ աջակցությունը Ուկրաինայի ինքնիշխանությանն ու տարածքային ամբողջականությանը Ռուսաստանի անընդունելի պատերազմի դեմ և վերահաստատել իրենց աջակցությունը պատերազմի դադարեցման համար կարգավորմանը հասնելուն։ Միացյալ Նահանգները շնորհակալություն հայտնեց Թուրքիային իր դերի համար՝ սևծովյան հացահատիկի արտահանման նախաձեռնությանը միջնորդելու համար:
Պետքարտուղար Բլինքենը և նախարար Չավուշօղլուն որոշել են ընդլայնել համակարգումը և համագործակցությունը Հարավային Կովկասում խաղաղության հաստատման համար։
Պետքարտուղար Բլինքենը և նախարար Չավուշօղլուն քննարկել են ՆԱՏՕ-ի համակարգումն ու համերաշխությունը ամրապնդելու ուղիները ներկայիս սպառնալիքների և մարտահրավերների պայմաններում։ Նրանք վերահաստատեցին իրենց հանձնառությունը հավաքական պաշտպանությանը՝ որպես դաշնակիցներ, ինչպես նաև ՆԱՏՕ-ի Բաց դռների քաղաքականությանը: Նրանք քննարկել են Ֆինլանդիայի, Շվեդիայի և Թուրքիայի կողմից ստորագրված եռակողմ հուշագրի իրականացումը, որն ուղղված է ՆԱՏՕ-ի դաշինքին միանալու Ֆինլանդիայի և Շվեդիայի հայտերն առաջ մղելուն:
Պետքարտուղար Բլինքենը և նախարար Չավուշօղլուն քննարկել են իրավիճակը Արևելյան Միջերկրական ծովում և պայմանավորվել կայունության և հաղորդակցության ուղիների պահպանման կարևորության շուրջ։
Պետքարտուղար Բլինքենը և նախարար Չավուշօղլուն վերահաստատել են ահաբեկչության դեմ պայքարի անհրաժեշտությունը՝ իր բոլոր ձևերով և դրսևորումներով։ Այս համատեքստում Միացյալ Նահանգները և Թուրքիան նախատեսում են հակաահաբեկչական խորհրդակցություններ անցկացնել որպես Ռազմավարական մեխանիզմի մաս՝ հիմնվելով նախկինում գոյություն ունեցող համագործակցության վրա՝ իրավապահ մարմինների միջև համագործակցության և տեղեկատվության փոխանակման միջոցով: Պետքարտուղարը ևս մեկ անգամ դատապարտել է 2022 թվականի նոյեմբերի 13-ին Ստամբուլում տեղի ունեցած ահաբեկչությունը և հաստատել, որ Միացյալ Նահանգները Թուրքիայի կողքին է ահաբեկչության դեմ պայքարում։ Երկու կողմերը ծրագրել են սերտ համակարգում և համագործակցություն պահպանել ահաբեկչական կազմակերպությունների, մասնավորապես ԴԱԻՇ-ի և PKK-ի դեմ պայքարում։
Կողմերը քննարկել են սիրիական ճգնաժամի բոլոր ասպեկտները և վերահաստատել Միացյալ Նահանգների և Թուրքիայի հանձնառությունը Սիրիայի վերաբերյալ քաղաքական գործընթացին՝ ՄԱԿ-ի Անվտանգության խորհրդի 2254 բանաձևի համապատասխան: Նրանք ողջունել են ՄԱԿ-ի Անվտանգության խորհրդի վերջին քվեարկությունը Սիրիա մարդասիրական օգնության սահմանային առաքումը երկարաձգելու վերաբերյալ: Երկու կողմերն անդրադարձան նաև Մերձավոր Արևելքի և Աֆրիկայի ավելի լայն խնդիրներին, ներառյալ տարածաշրջանային կայունության և կապերի կառուցման անհրաժեշտությանը տնտեսական և անվտանգության ոլորտում համագործակցության մեծացման միջոցով:
Պետքարտուղար Բլինքենը և նախարար Չավուշօղլուն բարձր են գնահատել ԱՄՆ-Թուրքիա-երկկողմ առևտրային հարաբերությունների շարունակական աճը։ Նրանք վերահաստատեցին տնտեսական համագործակցության և գործող երկկողմանի դաշտի հենքի վրա տարածաշրջանային և համաշխարհային տնտեսական հնարավորություններին աջակցելու կարևորությունը: Երկու կողմերն էլ հավանություն են տվել կլիմայի և էներգետիկայի շուրջ երկխոսությանը՝ էներգետիկ անվտանգության առաջխաղացման և ավելի մաքուր էներգիայի ապագայի անցման համար:
Նրանք որոշել են շարունակել իրենց ներգրավվածությունը Ռազմավարական մեխանիզմի շրջանակում՝ առաջընթացին հետևելու և իրենց դրական երկկողմ օրակարգը պահպանելու համար: Երկու կողմերը ողջունում են երկկողմ հանդիպումների ավելացումը, այդ թվում՝ ամենաբարձր մակարդակով Ռազմավարական մեխանիզմի շրջանակներում»,- նշված է ԱՄՆ-Թուրքիա համատեղ հայտարարության տեքստում:
Արամ ԱՎԵՏԻՍՅԱՆ
