Այսօր Եվրախորհրդարանում քվեարկվելու է երեկ քննարկված բանաձեւը՝ կապված Լաչինի միջանցքի փակման հետ: Այսօր ԱԺ ճեպազրույցների ժամանակ «Պատիվ ունեմ» խմբակցության ղեկավար Հայկ Մամիջանյանն ասաց, որ այն տեքստը, որն այս պահին շրջանառվում է՝ կարեւոր արձանագրումներ ունի, մասնավորապես այն, որ ԵԽ-ն կասկածի տակ է դնում ճանապարհը փակած ադրբեջանցիների իրապես ակտիվիստ լինելու տարբերակը, ինքնակոչ ակտիվիստ է անվանում. «Կարեւոր արձանագրում է այն, որ սա Ադրբեջանի կողմից նոյեմբերի 9-ի պայմանավորվածությունների խախտում է: Եվ ամենակարեւոր ու Հայաստանի իշխանությունների կողմից ամենացավալի արձանագրումը կայանում է նրանում, որ ՀՀ իշխանությունները դադարել են խոսել Արցախի ինքնորոշման իրավունքների, 3 հիմնարար սկզբունքների մասին՝ Հելսինկյան եզրափակիչ ակտը, որը տեքստում հստակ նշվում է որպես հանգուցալուծման հիմնարար տարբերակ: Այսինքն, միջազգային հանրությունն իր խոսույթով մեկ քայլ առաջ է, քան ՀՀ կառավարությունը»:
Մամիջանյանն անդրադարձավ նաեւ ՌԴ ԱԳ նախարար Սերգեյ Լավրովի՝ տարվա ամփոփիչ ասուլիսի ժամանակ հնչեցրած մտքերին, մասնավորապես, ՀԱՊԿ առաքելության մասին. «Շփման գծի երկայնքով առաջարկվում էր ՀԱՊԿ ստորաբաժանումների տեղակայում, որից ՀՀ-ն հրաժարվել է»:
Հարցին՝ խաղաղության պայմանագրի շուրջ բանակցությունները հիմա փակուղում չե՞ն՝ Մամիջանյանը պատասխանեց, որ առկա է խաղաղության 2 բանակցություն, մեկով Արցախի վերաբերյալ հիշատակում չկա, մյուսում առկա է հիշատակում եւ առկա է ինքնորոշման հնարավորություն տարիներ անց, խոսքը ռուսական տարբերակի մասին է. «Հայաստանը համաձայնել է երկուսին էլ: Երկու անկյունաքարային տարբերություն ունեցող պայմանագրերի պայմաններում ո՞նց կարելի է երկուսին էլ համաձայնել, ո՞ր լոգիկայով: Որը որ ստացվի: Հիմնականում ստացվում է մենակ իրենց թիմի հարստանալը»:
Կարդացեք նաև
Մամիջանյանն ասաց, որ Փաշինյանը 2021-ին ձայներ է կորզել՝ խոսելով խաղաղության օրակարգի, Արցախի հարցը երկու հիմնարար սկզբունքների հիման վրա լուծելու մասին:
Մամիջանյանը տարակուսած է. «Ձեր մտքով կանցնե՞ր ռուսական առաջարկները փոխանցել Վաշինգթոնին՝ տվյալ աշխարհաքաղաքական իրադրության ժամանակ: Պաշտոնական Երեւանը ռուսական տարբերակի առաջարկի պատասխանները Վաշինգթոնին է փոխանցում»:
Մամիջանյանը հիշեցնում է Լավրովի խոսքերը, որ պատրաստ էինք շարունակել բանակցությունները մեր ներկայացրած առաջարկների շուրջ, բայց ՀՀ եւ Ադրբեջանի ներկայացուցիչներն եկան արդեն իսկ Պրահայում կնքված պայմանավորվածություններով, որի անկյունաքարը Ալմա Աթայի հռչակագիրն է»: Մամիջանյանը հիշեցրեց, որ այդ հռչակագրին Հայաստանը միացել է վերապահումով եւ այն Արցախին վերաբերելի չի. «Եթե հիմնական բանակցողը այս սխալները գործել է, հասել է այս փուլին, էլ քանի՞ կոպեկի արժեք ունի իր ասածները՝ վավերացնելու եմ, չեմ վավերացնելու: Փաստերը այլ բան են հուշում»:
Հռիփսիմե ՋԵԲԵՋՅԱՆ
