ԱԺ ճեպազրույցներն այսօր ՔՊ պատգամավորները սկսեցին 1 րոպե լռությամբ հարգելով Ազատ գյուղի տարածքում տեղակայված ՀՀ ՊՆ N զորամասի ինժեներասակրավորային վաշտի կացարանում հրդեհի հետեւանքով զոհված 15 զինծառայողների հիշատակը:
ՔՊ խմբակցության քարտուղար Արթուր Հովհաննիսյանը մատնանշեց այն, որ դեպքի հետ կապված բանակում պաշտոնանկություններ են եղել: Ինչպես տեղեկացրել ենք, ազատվել են 2-րդ բանակային կորպուսի հրամանատար, գնդապետ Վահրամ Գրիգորյանը, 2-րդ բանակային կորպուսի շտաբի պետ-կորպուսի հրամանատարի տեղակալ, գնդապետ Միհրան Մախսուդյանը 2-րդ բանակային կորպուսի հրամանատարի տեղակալ թիկունքի և ԿՇԾ գծով, թիկունքի պետ, գնդապետ Շիրազ Խաչատրյանը եւ այլք:
Արթուր Հովհաննիսյանն ասաց, որ համապատասխան մարմինները կպարզեն դեպքի հանգամանքները: Լրագրողները հարցրեցին՝ այս ողբերգությունը պատճառ չէ՞, որ բացի ձեր նշած պաշտոնյաներից, նաեւ հրաժարական ներկայացնի ՊՆ նախարար Սուրեն Պապիկյանը, այսինքն, իրավական գործընթացներից զատ նաեւ հետեւի քաղաքական պատասխանատվություն: Արթուր Հովհաննիսյանը պատասխանեց. «Քաղաքական պատասխանատվության մասին կխոսենք, երբ որ դեպքի հանգամանքները կպարզվեն: Բայց մենք այս առիթով էլ նաեւ ցավալիորեն պետք է նշենք, որ ողբերգական դեպքերից հետո նոր սկսում ենք մտահոգվել, սկսում ենք զբաղվել: Խոսքը վերաբերում է բոլոր քաղաքացիներին առհասարակ՝ տնտեսվարողներից սկսած: Գոյություն ունեն օրենքներ, կանոնակարգեր, որոնց պահպանման դեպքում նման ողբերգական դեպքեր չենք ունենա, հիշում ենք «Սուրմալուի» դեպքը: Մենք պետք է ամեն ինչ անենք, որ բացառենք նման երեւույթները եւ ինչպես վարչապետն էլ նշեց, ընդհուպ ֆիզիկապես փակենք բոլոր այն օբյեկտները, որտեղ չեն պահպանվում այս նորմերը, որովհետեւ արդյունքում մենք մեր հայրենակիցներին ենք կորցնում: Ինչ վերաբերում է քաղաքական պատասխանատվությանը, քաղաքական եւ քրեաիրավական պատասխանատվության մասին կխոսենք, երբ որ դեպքի մանրամասներն ամբողջությամբ պարզ կլինեն»:
Լրագրողները ճշտեցին՝ այսինքն, չե՞ք բացառում, որ կլինի՝ նա պատասխանեց. «Կներեք, էլի, հիմա ողբերգական դեպք է տեղի ունեցել եւ ես կարծում եմ՝ այս հարցն այս պահին տեղին չի, քանի դեռ հանգամանքները պարզված չեն: ՊՆ նախարարը, այո, քաղաքական պատասխանատուն է, մենք բոլորս ենք պատասխանատու, իշխանությունն է պատասխանատու բոլոր տեղի ունեցած իրավիճակների համար մեր երկրում, բայց դա չի նշանակում, որ մենք պետք է միանգամից փորձենք գտնել քավության նոխազների եւ փորձենք ամեն ինչ փաթաթել մեկ մարդու վզին»:
Կարդացեք նաև
Նա ասաց, որ պետք է քննություն լինի ու պատասխանատվության կենթարկվի այն մարդիկ, որոնք պատասխանատվության տիրույթում է եղել դա:
Հռիփսիմե ՋԵԲԵՋՅԱՆ
