Արդարադատության նախարար Գրիգոր Մինասյանն այցելել է Քրեակատարողական ծառայություն՝ 2023թ.-ին առաջին եռամսյակում նախատեսված աշխատանքները քննարկելու նպատակով
Արդարադատության նախարար Գրիգոր Մինասյանը, նախարարի տեղակալ Լևոն Բալյանն այցելել են Քրեակատարողական ծառայության կենտրոնական մարմին՝ 2023թ.-ին առաջին եռամսյակում նախատեսված աշխատանքները քննարկելու նպատակով:
Նախարար Գրիգոր Մինասյանն ընդգծել է, որ քրեակատարողական ոլորտում իրավիճակը բարելավելու, ինչպես նաև ոլորտի շարունակական զարգացումն ապահովելու համար հիմնական նպատակը լինելու է քրեական պատիժների ոլորտում վերականգնողական արդարադատության սկզբունքների ներդրումը, քրեական ենթամշակույթի վերացումն ու կրկնահանցագործությունների կանխումը, ինչն էլ ամրագրված է Քրեակատարողական և Պրոբացիայի ոլորտի 2019-2023թթ.-ի ռազմավարությամբ:
Գրիգոր Մինասյանը շեշտել է, որ հատուկ ուշադրություն պետք է դարձնել ազատությունից զրկված՝ չափահաս, անչափահաս անձանց պահման պայմանների և մատուցվող բժշկական օգնության ու սպասարկման պայմանների բարելավմանը:
Կարդացեք նաև
Անդրադառնալով կադրային քաղաքականության կատարելագործմանը՝ նախարարը կարևորել է քրեակատարողական հիմնարկներում ատեստավորման գործընթացի պատշաճ իրականացումը:
Մասնավորապես` նախատեսվում է ներդնել Քրեակատարողական ծառայության ծառայողների (բացառությամբ քրեակատարողական հիմնարկներում նոր ստեղծվող անվտանգային կառավարման ստորաբաժանման ծառայողների) ատեստավորման և դրա հիման վրա հավելավճար ստանալու իրավունք ձեռք բերելու կառուցակարգ։
Առաջարկվում է Քրեակատարողական հիմնարկների կողմից իրականացվող արտաքին պահպանության և անվտանգության ապահովման գործառույթների միավորման միջոցով ստեղծել նոր՝ անվտանգային կառավարման ստորաբաժանում, որտեղ միայն կներգրավվեն համապատասխան ուսումնական դասընթացներ անցած և մասնագիտական անհրաժեշտ հմտություններ ու գիտելիքներ ձեռք բերած քաղաքացիները։
Նախատեսվում է Ոստիկանությունում Պարեկային ծառայության ներդրման օրինակով, սկզբնական շրջանում նոր կադրերին ներգրավել «Արմավիր» քրեակատարողական հիմնարկում, որին հաջորդելու է մյուս քրեակատարողական հիմնարկներում առավել պատրաստված կադրերի ներգրավմանն ուղղված շարունակական բարեփոխումները: Այս բարեփոխումները հետապնդում են Քրեակատարողական ծառայությունում որակյալ կադրերի ներգրավման և պահպանման, ինչպես նաև ծառայողների վարձատրության պայմանների էական բարելավման նպատակ:
Քննարկման ընթացքում Քրեակատարողական ծառայության ղեկավար, գեներալ-մայոր Սերգեյ Ատոմյանը ներկայացրել է ոլորտի առաջիկա անելիքները:
Երկուստեք կարևորվել է նոր քրեակատարողական հիմնարկի կառուցմանն ուղղված աշխատանքների իրականացումը և ընդգծվել դրա հրատապությունը:
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅՈՒՆ
