«Հայաստանի իշխանություններին բնութագրող առաջնային հատկանիշներից մեկը անպատասխանատվությունն է, որն արտահայտվում է մի շարք ուղղություններով` սկսած հայ ժողովրդի նկատմամբ ստանձնած պարտավորություններից, վերջացրած Սահմանադրությամբ, օրենքներով»,- այսօր ԱԺ-ում լրագրողների հետ զրույցում ասաց «Պատիվ ունեմ» խմբակցության քարտուղար Տիգրան Աբրահամյանը:
Վարչապետ Նիկոլ Փաշինյանը հրավիրած ասուլիսում ասաց, որ ՀԱՊԿ զորավարժությունները Հայաստանում անցկացնելը նպատակահարմար չի համարում, ուստի այդ մասին պաշտոնական խողովակներով տեղեկացրել են: Նա բացատրեց, որ եթե ՀԱՊԿ զորավարժություններն անեն ու գնան, դա սպառնալիք կլինի ՀՀ-ի համար:
Թե այս դիրքորոշումը որքանով էր ճիշտ՝ Տիգրան Աբրահամյանը պատասխանեց. «Եթե առաջնորդվենք այդ մոտեցմամբ, ապա ՀՀ զինված ուժերը եւս որեւէ զորավարժություն, մարտունակության բարձրացման որեւէ միջոցառում պետք է չիրականացնի: Ի վերջո, մենք խոսում ենք ՀԱՊԿ ռազմաքաղաքական դաշինքի մասին եւ զորավարժությունների անցկացումն ինչպես այդ ձեւաչափով, այնպես էլ առհասարակ՝ առաջին հերթին ուղղված է զինված ուժերի մարտունակության բարձրացմանը, իսկ ՀԱՊԿ-ի պարագայում՝ ուղղված է նաեւ նրա կազմում զորքերի ներդաշնակեցմանը»:
Տիգրան Աբրահամյանի դիտարկմամբ՝ ՌԴ-ի ու ՀԱՊԿ-ի դիրքորոշումը այս տարի հենց ՀՀ-ում անցկացնել այդ զորավարժությունները, ունեցել է քաղաքական նպատակ. «Պայմանավորված Հայաստանում ստեղծված իրավիճակով՝ դա որպես ՀՀ-ին սատարման քայլ եմ ես դիտարկում: Հայաստանի իշխանությունների որոշումը իմ համար մեծ առումով ընկալելի չէ եւ չեմ տեսնում դրա՝ Հայաստանի համար բարենպաստ լինելը»:
Կարդացեք նաև
Հռիփսիմե ՋԵԲԵՋՅԱՆ
