«Դեղերի մասին» ՀՀ օրենքում փոփոխությունների նախագծի համաձայն՝ առողջապահական եւ տեսչական մարմնին կտրվի հսկիչ գնում կատարելու լիազորություն՝ բացահայտելու համար դեղերի շուկայում առկա՝ ապօրինի ներկրված եւ կեղծ դեղերը։ Այս մասին այսօր ԱԺ 8-րդ գումարման 5-րդ նստաշրջանի առաջին նիստում ասաց նախագծի հեղինակ, ՔՊ խմբակցության պատգամավոր Նարեկ Զեյնալյանը։
«Երբ տեսուչն այցելում է դեղ վաճառող տնտեսվարողի, նա համարվում է արդեն իսկ ծանուցված։ Տեսչական մարմինը հնարավորություն է ունենում տեղում ստուգում անելու։ Պատժաչափը փոխվում է։ Մինչեւ 5 փաթեթ ապօրինի ներկրված դեղ հայտնաբերվելու դեպքում տուգանքը կկազմի նվազագույն աշխատավարձի 1000-ապատիկի չափով, իսկ 5 փաթեթից ավելիի դեպքում՝ 2000-ապատիկի չափով։ 1 տարում կրկին հայտնաբերելու դեպքում լիցենզիան կկասեցվի երկու ամսով, իսկ եւս մեկ անգամ հայտնաբերելու դեպքում՝ առհասարակ կդադարեցվի։ Նախկին տուգանքները փոքր էին, եւ անբարեխիղճ տնտեսվարողները դա վճարում էին ու շարունակում վաճառել այդ դեղորայքը»,-հայտարարեց Նարեկ Զեյնալյանը։
«Հայաստան» խմբակցության պատգամավոր Գեղամ Նազարյանը (լուսանկարում) հետաքրքրվեց՝ ապօրինի դեղը մարդու առողջության համար վտանգ ներկայացնող դեղամիջո՞ցն է, թե ՀՀ-ում գրանցված դեղերի ցուցակում չներառված դեղը։ Նարեկ Զեյնալյանը պատասխանեց, որ կա ՀՀ-ում գրանցված դեղերի ցանկ, որից դուրս գտնվող դեղերի մուտքը ՀՀ, անկախ որակից, համարվում է ապօրինի ներկրում․ «Բացառություն է առողջապահության նախարարության հատուկ թույլտվությամբ չգրանցված դեղերի ներմուծումը։ Օրինակ, կորոնավիրուսի ժամանակ կոնկրետ ցանկով ներկրվում էին ՀՀ-ում չգրանցված, բայց անհրաժեշտ դեղորայքներ։ Իսկ կեղծ է այն դեղը, որի ազդող նյութն իրականում այն չէ, ինչ նշված է դեղին կից թերթիկում»։
Գեղամ Նազարյանը նաեւ հարցրեց՝ վտանգ չեք տեսնո՞ւմ, որ ստուգումները կլինեն ընտրովի՝ կոնկրետ գործարարների հանդեպ։ Նարեկ Զեյնալյանը պատասխանեց, որ տեսչական մարմինը ստուգումների հատուկ մեթոդաբանություն ունի եւ գնահատում է ռիսկայնությունը, տարեկան պլանով իրականացնում ստուգում․ «Դիմում-բողոքների հիման վրա եւս կարող են ստուգումներ իրականացնել»։
Կարդացեք նաև
Գեղամ Նազարյանն առաջարկեց՝ ապօրինի ներկրված դեղերի դեմ պայքարելու փոխարեն ավելի լավ չի լինի՞ հասկանալ, թե նման դեղերի պահանջարկը ՀՀ-ում ինչո՞ւ է մեծ, գուցե այդ դեղերը պետք է ներառե՞լ ՀՀ-ում գրանցված դեղերի ցուցակում։ Նարեկ Զեյնալյանը պատասխանեց․ «Այդ ցանկում դեղերի ընդգրկումը մեխանիկական գործընթաց չէ։ Դեղը գրանցում պետք է անցնի, որպեսզի ընդգրկվի ցանկում։ Գրանցումը պետք է անի միայն արտադրողը, որը պետք է հայտ ներկայացնի։ Նախարարության գործառույթը միայն այն է, որ բանակցի դեղ արտադրողի հետ։ Դա, վստահեցնում եմ, արվում է, բայց ցանկությունը դեղ արտադրողինն է։ Դրա համար ունենք իրավիճակներ, երբ դեղը պետք է, բայց գրանցված չէ, այդ պատճառով ապօրինի է ներկրվում»։
Լուիզա ՍՈՒՔԻԱՍՅԱՆ
