«Վերածնվող Հայաստան» կուսակցության նախագահ Վահե Հակոբյանի կարծիքով՝ Արցախի հարցով գործող իշխանությունների քայլերը, հայտարարությունները կամ գործողությունները վերլուծելու, քննադատելու վրա ժամանակ պետք չէ կորցնել:
«Շրջափակված Արցախ. Ադրբեջանի անտարբերության ճիրաններում» թեմայով քննարկման ժամանակ Վահե Հակոբյանը նկատեց, որ ակնհայտ է, որ ՀՀ իշխանությունները շարունակում են ամրապնդել իրենց որդեգրած քաղաքականությունը, որ որեւէ գործ չունեն Արցախի հետ:
«Հանցավոր է, թե ինչ է, այսօր սա քննարկելու ժամանակը չունենք, դրանց պատասխանները կստանանք մոտ ապագայում: Օրեր առաջ Նիկոլ Փաշինյանը հայտարարեց, որ 2020 թվականի նոյեմբերի 9-ի եռակողմ հայտարարության 6-րդ կետի առնչությամբ որեւէ գործ իրենք նույնպես չունեն: Սա շատ էժան սուտ է ու մանիպուլյացիա, որովհետեւ այդ նույն անձնավորության ստորագրությունն է դրված այդ փաստաթղթի տակ ու ուզի-չուզի կրում է թե՛ վերցրած, թե՛ չկատարած պարտավորությունների պատասխանատվությունը: Այս մեծ խաղերի մեջ Նիկոլ Փաշինյանն ու իր խմբակը փորձում են իրենց մանր խաղիկները տանել նույնիսկ այս պարագայում: Փոխանակ հարցերը ուղղել ռուս խաղաղապահներին եւ ակնկալել պատասխաններ, շարունակում են փնովել Ռուսաստանի խաղաղապահների հեղինակությունը ու հող են նախապատրաստում Արեւմուտքին ներգրավելու համար: Առաջարկում եմ այս կարճ էքսկուրսից հետո նրանց չանդրադառնալ»,- ասաց Վահե Հակոբյանը:
Նրա համոզմամբ, ստեղծված իրավիճակում ամենակարեւոր դերակատարն Արցախն է, որը պետք է իր ձայնը բարձրացնի եւ հասանելի դարձնի բարձր բոլորի համար. «Արցախի նորանշանակ ԱԳ նախարարը այսօր գտնվում է ոչ թե Արցախում, այլ Երեւանում: Մենք բոլորս` Հայաստան, Սփյուռք, Արցախ, բոլորի եղած ռեսուրսները պետք է կոնսոլիդացնենք եւ հանդիպումներ կազմակերպենք, մասնավորապես երկրից դուրս: Դա ոչ միայն Ռուսաստանն է, մեր բոլոր բարեկամական երկրների ամենաբարձր մակարդակով այդ երկրների ղեկավարների հետ, որտեղ շատ պարզ մեսիջ է պետք փոխանցել, որ այլընտրանք չկա այսօր, քան կիրառել բանաձեւ` անջատում հանուն փրկության, այսինքն, Արցախի ճանաչման հարցն այսօր պետք է սարքել օրակարգում համար մեկ: Միաժամանակ, մենք պետք է բացառենք եւ հանենք ցանկացած օրակարգերը, որտեղ անգամ թեթեւ հնչում է թեզ, որ Արցախը պետք է լինի Ադրբեջանի կազմում, դա պետք է բացառենք»:
Կարդացեք նաև
Արփինե ՍԻՄՈՆՅԱՆ
