ՀՀ գործող իշխանություններից Հայաստանի եւ Արցախի համար ինչ-որ երաշխիքներ պահանջելն, ըստ ՀՀԿ ԳՄ անդամ, ԱԺ «Պատիվ ունեմ» խմբակցության ղեկավար Հայկ Մամիջանյանի, կլիներ նույնը, ինչ սերիական մարդասպանից դատարանում պահանջել, որ այսուհետ նա իրեն խելոք է պահելու:
Այսօր, ՀՀԿ ԳՄ նիստից հետո, լրագրողների հետ զրույցում, Հայկ Մամիջանյանն ասաց. «Նմանօրինակ երաշխիքներ այս իշխանությունը տալ չի կարող: Այս իշխանության որոշ ներկայացուցիչներ, որոնք իրենց մարդկային եւ որակական հատկանիշներով իրավունք չունեն զբաղեցնել իրենց զբաղեցրած պաշտոնները: Մասնավորապես, ԱԽ քարտուղարի մասին եմ խոսում. իմ խորին համոզմամբ, կատարում են հստակ գծված, ուղղորդվող եւ, ինչու չէ, նաեւ ֆինանսավորվող՝ ամենատարբեր ուժային կենտրոնների կողմից քաղաքականություն»:
Հայկ Մամիջանյանը հիշեցնում է, որ գործող իշխանությունը ոչ միայն ՀԱՊԿ զորավարժությունների անցկացումն է մերժել, այլ մի քանի ամիս առաջ մերժեց նաեւ ՀԱՊԿ աջակցության փաթեթը, որը իր մեջ պարունակում էր նաեւ ռազմական աջակցություն՝ հիմնվելով, իր համոզմամբ, անհամադրելի բացատրության վրա: Ուստի, այս իրավիճակում, երաշխիքներ ակնկալել նրանցից, ընդդիմադիր գործիչն անիմաստ է համարում:
Հայկական երկու պետությունների ղեկավարների տարաձայնությունները, ստեղծված իրավիճակում, ըստ Հայկ Մամիջանյանի, միակ փրկօղակն են՝ հայկական երկու հանրապետությունների գոյատեւման համար: Նրա գնահատմամբ, շատ ավելի ցավալի կլիներ, եթե Արցախի իշխանությունները համամիտ լինեին Արցախի հանձնման հետ: Ընդդիմադիր գործիչը զգուշացնում է՝ թույլ չեն տալու, որ Նիկոլ Փաշինյանը գրանցի իր ակնկալած արդյունքները:
Կարդացեք նաև
Այս գործընթացների համատեքստում, Հայկ Մամիջանյանը, որպես «վերջին անհույս խռխռոց» է ընկալում այսօր, «Պատիվ ունեմ» խմբակցության պատգամավոր Աննա Մկրտչյանի հետ կատարվածը, ՀՅԴ-ական գործիչների հետ կատարվողը, մի քանի օր առաջ, ՀՀԿ-ական երիտասարդների հետ կատարվածը: Նա հայտարարում է, որ այս գործողություններն իրենց ավելի ուժեղ են դարձնում եւ երկու քաղաքական ուժերն էլ փորձ ունեն ի շահ ՀՀ-ի՝ ընդհատակում գործելու. «Նպատակը մեկն է՝ փրկել սեփական կաշին եւ կաշեպատ աթոռը: Փաշինյանն ու իր խմբակը՝ շատ ավելի լավ, ուժեղ ու շատ ավելի՝ իրենց համար վտանգավոր են զգում իրենց հեռացման եւ վերջապես ՀՀ-ին արժանապատվության վերադարձման հոտը եւ շատ ավելի վախվորած են, քան մեր որոշ ընդդիմադիր գործընկերներ»:
Նելլի ԳՐԻԳՈՐՅԱՆ
