«Դուք ասել եք, որ ունեւոր ընտանիքը գնացել է հանգստի, իսկ մեկ այլ դեպքում մեկը կարողացել է խաղաղապահների միջոցով սնունդ բերել եւ թանկ գնով վաճառել Արցախում։ Ի՞նչ նպատակով եք նման հայտարարություններ արել։ Այն դեպքում, երբ ձեր ասած ընտանիքը ոչ թե հանգստի է մեկնել, այլ երեխային տեղափոխել բուժման»,- Ադրբեջանի կողմից Արցախի շրջափակման մեկ ամսվա առիթով Արցախի հանրային հեռուստաընկերության կազմակերպած քննարկման ժամանակ այսօր նման հարց ուղղվեց Արցախի պետնախարար Ռուբեն Վարդանյանին։
Նա նշեց․ «Առաջինը, որ զգացի Արցախ տեղափոխվելուց հետո, մարդկանց մոտ անարդարության զգացումն է։ Տարբեր մարդիկ տարբեր պայմաններում են ապրում՝ լինելով նույն վտանգի առաջ։ Ինչ ասել եմ, Արցախում բոլորը գիտեն եւ խոսում են։ Ուրիշ դեպքեր էլ կան, որոնք եղել են։ Երբ դեկտեմբերի 31-ին հարուստ ընտանիքների երեխաները մեքենան բենզինով հետ ու առաջ էին քշում, դա բոլորն են տեսնում, հետեւաբար՝ Ռուբեն Վարդանյանը չէ, որ պետք է դա ասի։ Բոլորը գիտեն։ Եթե չեմ ասում, ստացվում է, որ իրենց կողքը կանգնած եմ։ Կանգնած չեմ։ Եթե մի ամիս հետո բենզին չեղավ, որ շտապօգնությունը գնա երեխայի փրկելու, այդ մարդիկ, այդ «լավ տղերքը» իրենց վատ են զգալու․․․Պետք չէ վախենալ խոսել թերություններից»։
Ռուբեն Վարդանյանը նաեւ նշեց, որ երեկ Ստեփանակերտի տաքսիստներին է հանդիպել․ «Հավատացնում եմ, որ իրենք ավելի շատ բան գիտեն, թե վարչապետը, նախագահը կամ ԱԱԾ-ն»։
Կարդացեք նաև
Լուիզա ՍՈՒՔԻԱՍՅԱՆ
