«Մենք ասել ենք, որ պատրաստ ենք երկխոսելու, բայց ոչ աստիճանական զիջման ռեժիմով այն ամենի, ինչը պայմանավորվել էինք ձեռք չտալ։ Ցավոք, Ադրբեջանը հրաժարվում է։ Ոչ մի խոսակցություն չի եղել հարցին քաղաքական լուծում տալու համար»,-Ադրբեջանի կողմից Արցախի շրջափակման մեկ ամսվա առիթով Արցախի հանրային հեռուստաընկերության կազմակերպած քննարկման ժամանակ այսօր հայտարարեց Արցախի պետնախարար Ռուբեն Վարդանյանը՝ արձագանքելով միջազգային ԶԼՄ-ներից մեկի հարցին, թե արդյոք պատրա՞ստ են Ադրբեջանի հետ երկխոսել։ «Մենք պայքարում ենք մեր սեփական հողի վրա ապրելու համար, ունենալու համար սեփական օրենքներով կյանք։ Սա նշանակում է բավականին կոշտ դիրքավորում, եւ այն տարբերվում է ՀՀ-ի դիրքորոշումից, ՀՀ իշխանության դիրքորոշումից։ Այս իմաստով մենք դա նույնպես բարձրաձայնել ենք Արցախի անվտանգության խորհրդի նիստում»,-շեշտեց Ռուբեն Վարդանյանը։
Նա պնդեց, որ Ադրբեջանի հետ երկխոսություն կարող են ունենալ, բայց քաղաքական, այլ ոչ թե տեխնիկական, որում Ադրբեջանն իր որոշումներն է ուզում առաջ տանել։
Լուիզա ՍՈՒՔԻԱՍՅԱՆ
