Մոսկվան անհեթեթ է համարում Երևանի որոշումն այն մասին, որ ռուսական ներկայությունը Հայաստանում կարող է սպառնալիք ստեղծել Երևանի համար: Այս մասին հայտարարել է Ռուսաստանի ԱԳՆ պաշտոնական ներկայացուցիչ Մարիա Զախարովան:
Նրա խոսքով՝ Ռուսաստանը շարունակում է աշխատանքը Լաչինի միջանցքի «լիարժեք ապաշրջափակման ուղղությամբ», և անհրաժեշտ է գտնել որոշում, որը ընդունելի կլինի երկու կողմերի համար: Նա նշել է, որ Ռուսաստանը պատրաստվում է զբաղվել ոչ թե պոպուլիզմով, այլ առարկայական աշխատանքով:
«Այս պահին միջանցքով անցնում են մարդասիրական օգնության շարասյուները: Կցանկանայինք ևս մեկ անգամ նշել, որ անընդունելի ենք համարում հանրային հարձակումները և սադրանքները մեր խաղաղապահների նկատմամբ, նրանք տարածաշրջանում խաղաղության երաշխավոր են: Նման գործողությունները կարող են վնաս հասցնել հայ-ադրբեջանական կարգավորման գործընթացին»,- ասել է Զախարովան:
Նա հավելել է, որ Մոսկվան տրամադրված է ամեն կերպ ամրապնդել ինչպես երկկողմ, այնպես էլ բազմակողմ հարաբերությունները՝ ՀԱՊԿ, ԵԱՏՄ, ԱՊՀ ինտեգրացիոն միավորումների շրջանակում: ‘
Կարդացեք նաև
«Այս ֆոնին Երևանի հայտարարությունն այն մասին, որ «ռուսական ներկայությունը որոշակի սպառնալիք է ստեղծում Հայաստանի անվտանգության համար», անհեթեթ է: Տասնամյակներով մեր զինվորականները, սահմանապահները զգալի ներդրում են ունենում Հայաստանի անվտանգությունն ապահովելու, նրա սահմանների պաշտպանելու գործում: Դա օբյեկտիվ իրականություն է, որը հնարավոր չէ հերքել: Ընդ որում, նախկինում Հայաստանի ղեկավարությունը հրապարակային հայտարարել է, որ Ռուսաստանի ներկայությունը համապատասխանում է հանրապետության ազգային շահերին»,- ասել է Զախարովան:
Պատրաստեց Վիկտորյա ԱՆԴՐԵԱՍՅԱՆԸ
