«ՀՀ-ում գտնվող Արցախի քաղաքացիները խնդիրների առաջ են՝ կտրված են ընտանիքներից։ Սա նաեւ բավականին լուրջ հոգեբանական հետեւանքներ ունի ծնողների եւ երեխաների համար։ Խնդիրներն առաջնահերթ կապված են կեցության, սննդի ապահովման, առողջապահական ծառայություններից օգտվելու հետ։ Մեր հայրենակիցները հիմնականում Գորիսում են։ Ովքեր առողջական խնդիրներ ունեն, Երեւանում են»,-Ադրբեջանի կողմից Արցախի շրջափակման մեկ ամսվա առիթով Արցախի հանրային հեռուստաընկերության կազմակերպած առցանց քննարկման ժամանակ այսօր հայտարարեց Արցախի հանրապետության արտաքին գործերի նախարար Սերգեյ Ղազարյանը։
Նրա փոխանցմամբ՝ ՀՀ կառավարության աշխատանքային համապատասխան խմբի հետ աշխատանքներ են տարվում՝ Արցախի քաղաքացիների խնդիրների լուծման նպատակով։
Ինչ վերաբերում է միջազգային արձագանքներին, ապա Սերգեյ Ղազարյանը նշեց․ «Արձագանքները հիմնականում ուղղված են իրավիճակը հանգուցալուծելուն։ Դեկտեմբերի 20- ին ՄԱԿ ԱԽ հրատապ նիստում նաեւ հնչել են կոնկրետ, հասցեական դիրքորոշումներ՝ ուղղված Ադրբեջանին, որ պետք է դադարեցնի շրջափակումը։ Արցախի շրջափակումը միայն հայ ժողովրդի խնդիրը չէ, այն առաջադեմ աշխարհի եւ հանրության խնդիրն է»։
Կարդացեք նաև
Լուիզա ՍՈՒՔԻԱՍՅԱՆ
