Արցախի Հանրապետության ԱԳ նախկին նախարար Դավիթ Բաբայանը ՖԲ ուղիղ եթերում խոսելով Արցախում ստեղծված իրավիճակի մասին՝ ասաց․ «Մենք իսկապես մեր ժողովրդի պատմության ամենավճռական փուլում ենք գտնվում։ 2023 թվականը շատ կարեւոր ժամանակահատված է լինելու մեզ համար։ Ինչ-որ տեղ կարող է ջրբաժան լինել։ Եվ յուրաքանչյուրս պետք է այս կարեւորությունը դիտարկենք։ Քննադատությունը անհրաժեշտ է, բայց քննադատությունը պետք է տարբերել հայհոյանքից։ Եվ երբ մեկը մյուսին հայհոյում, անիծում է, պետք է միշտ պատկերացնի, որ վաղը նրա հետ նույն խրամատում կարող է հայտնվել։
Ես շարունակելու եմ մեր ժողովրդին եւ պետականությանը ծառայել ինչով որ կարող եմ։ Գուցե ավելի հաճախակի մենք այսպես շփվենք։ Ես ունեմ մի շարք ծրագրեր ու կտեսնենք, թե ինչպես են գործերն ընթանում։ Բայց որ անմնացորդ կապված եմ պետության եւ ժողովրդի հետ, սա միանշանակ է՝ անկախ զբաղեցրած այս կամ այն դիրքից։ Իսկ դիրքը պետք է մեկը լինի, ազգի ճակատագրի խրամատում։ Չափազանց կարեւոր է, որ մենք հիմա լինենք միասնական։ Բայց միասնականությունը չի նշանակում, թե պետք է կուլ տանք այս կամ այն սխալները։ Չէ։ Բայց ձեւ կա այդ ամենը ներկայացնելու։ Այս երկու տարիների ընթացքում արտգործնախարարությունը ահռելի աշխատանք է տարել նաեւ արտերկրում, սփյուռքում։
Շարունակելու ենք աշխատել։ Բնական է, մի քիչ ավելի ազատ եմ լինելու տարբեր մտքերի եւ գաղափարների շուրջ խոսելու, ինչը, կարծում եմ, նման ժամանակահատվածում չափազանց կարեւոր է։ Մենք պետք է նաեւ անձնական օրինակով ցույց տանք, թե ինչ է հայրենասիրությունը՝ պարկեշտ ծառայելով սեփական ժողովրդին։
Հնարավորություն կա դեռեւս Արցախը պահպանելու։ Ես եւ իմ ընկերները, կուսակիցները շարունակելու ենք մեր առաքելությունը՝ պահպանել Արցախը։ Հետեւաբար, համոզված եմ, որ մենք դեռեւս ունենք անցնելու երկար ճանապարհ։ Այո, ծանր է լինելու, բայց այնուամենայնիվ, հնարավորություն կա։ Եվ ամեն մի ժողովրդի չէ, որ Աստված տալիս է ինքնամաքրվելու հնարավորություն։ Պետք է ինքնամաքրվել։ Սա է ամենակարեւոր բանալին դեպի հուսալի գալիք։ Արտաքին թշնամիները կան ու կան։ Եվ նրանք չեն էլ թաքցնում իրենց նպատակները։ Բայց եթե ինքնամաքրվենք, կարողանալու ենք դիմակայել։ Եվ քանի այդ հնարավորությունը կա, բոլորս միահամուռ, միակամ անենք ամեն ինչ պետության եւ ժողովրդի փրկության համար»։
Կարդացեք նաև
Աշոտ ՀԱԿՈԲՅԱՆ
