Ինչպես են շրջափակված արցախցի դիմորդները մասնակցելու միասնական քննություններին, եւ քանի հայտ կա Արցախից: Այս հարցերին ի պատասխան՝ ԿԳՄՍ ԳԹԿ փոխտնօրեն Կարո Նասիբյանն Արմենպրեսի» մամուլի սրահում կայացած ասուլիսում նշեց, որ անընդհատ կապի մեջ են Արցախի ԳԹԿ-ի տնօրենի հետ. «Մինչեւ թշնամու կողմից Արցախի շրջափակումը տեղեկացված ենք եղել, որ Արցախը նախապես չէր ուզում հունվար-փետրվար ամիսների քննությունները կազմակերպել: Արցախի Գնահատման եւ թեստավորման կենտրոնը դիմել էր իրենց դիմորդներին, եւ որոնք, այնուամենայնիվ, ցանկություն ունեին հունվար-փետրվար ամիսներին մասնակցել միասնական քննություններին, հայտագրվել էին, որպեսզի քննությունները հանձնեն Գորիսում: Թշնամու շրջափակման պատճառով, սակայն, արցախցի դիմորդները հնարավորություն չունեն գալ Գորիս եւ հանձնել քննությունը: Մեզ համար եւ Արցախի համար այդ հարցը մնում է առկախված»:
Կարո Նասիբյանի խոսքով, ադրբեջանական կողմի՝ շրջափակման պատճառով խախտվում է երեխայի քննություն հանձնելու իրավունքը. «Պարզապես պետք է մտածել, թե հետագայում ինչպես փոխհատուցել դա: Ունենք արցախցի 50 դիմորդ, ամենաշատը հայտագրվել են անգլերենից քննություն հանձնելու համար՝ 20 հոգի: Արցախի նախարարության հետ կքննարկենք այդ հարցը»:
ԳԹԿ փոխտնօրենը նշեց, որ արցախցի 50 դիմորդները հիմնականում ցանկանում են իրենց ուսումը շարունակել Հայաստանում:
Կարդացեք նաև
Տեսանյութն՝ ավելի ուշ:
Գոհար ՀԱԿՈԲՅԱՆ
