Ռեննի արքեպիսկոպոս եւ քրիստոնյաների միասնության եւ հուդայականության հետ հարաբերությունների Հանձնաժողովի նախագահի ժամանակավոր հանձնակատար Պիեր դ՚Օրնելլայի առաջարկով հայերի համար համընդհանուր աղոթք է արվել Ֆրանսիայի բոլոր գործող եկեղեցիներում՝ Աստվածահայտնության տոնի առթիվ հունվար 8-ի կիրակնօրյա պատարագների ժամանակ.
«Տեր Հիսուս, Խաղաղության իշխան, մեր աղաչանքն ենք հղում Քեզ Լեռնային Ղարաբաղի հայերի համար։ Միջազգային հանրության լռության ներքո նրանք զոհ են բռնությունների, որոնք հանգեցնելու են նրանց բնաջնջմանը։ Բոլորիս մեջ արթնացրու գթասրտություն, որը կարող է օգնել նրանց։ Ադրբեջանի, Ռուսաստանի եւ Հայաստանի ղեկավարներին ներշնչիր արդարության եւ երկխոսության մղում, որպեսզի հարգվեն Լեռնային Ղարաբաղի բոլոր բնակիչների արժանապատվությունն ու հավատը»:
