Արդեն 27 օր Արցախը զրկված է պարենի, վառելիքի, դեղորայքի, մանկական կերի համալրումից, երկրում արդեն սուղ են միջոցները, խանութներն ու դեղատները դատարկ են, մարդիկ երթևեկելու համար վառելիք չունեն: Այս իրավիճակում շատերն են նշում, որ Հայաստանը պետք է դիմի Միավորված ազգերի կազմակերպության (ՄԱԿ) Պարենի համաշխարհային ծրագիր (ՊՀԾ)-ին:
Ի դեպ, ՊՀԾ-ն տարածաշրջանում միակ գրասենյակն ունի Հայաստանում: Ոչ Ադրբեջանում, ոչ Վրաստանում գործող գրասենյակ ծրագիրը չունի:
ՄԱԿ Պարենի համաշխարհային ծրագիրը (ՊՀԾ) աշխարհի ամենամեծ մարդասիրական կազմակերպությունն է և համարվում է աշխարհում սովի դեմ պայքարի և պարենի անվտանգության առաջամարտիկը։
168.am-ը դեռևս հունվարի 5-ի առավոտյան դիմեց Պարենի համաշխարհային ծրագրի հայաստանյան գրասենյակ՝ փորձելով պարզել՝ արդոք ՀՀ կառավարությունը դիմե՞լ է ծրագրին՝ ստեղծված իրավիճակում Արցախ մարդասիրական օգնություն հասցնելու համար, և առհասարակ կա՞ն դիմումներ՝ Լաչինի միջանցքի փակման հետ կապված Արցախում հումանիտար աղետը կանխելու հետ, և ի՞նչ ընթացք է տրված դրանց:
Կարդացեք նաև
ՊՀԾ հայաստանյան գրասենյակից 168.am-ին ասացին, որ հարցին չեն կարող պատասխանել, սակայն նշեցին, որ ՊՀԾ-ն հայտարարություն է նախապատրաստում, որը կտարածի մոտ օրերս:
«Հայաստանի կառավարությունը հստակ է եղել իր դիրքորոշման և միջազգային հանրությանն ուղղված խնդրանքների մեջ, այդ թվում՝ վերջին օրերին հրապարակայնորեն և ավելի վաղ՝ ՄԱԿ-ի Անվտանգության խորհրդին։ ՊՀԾ-ն մտահոգությամբ է հետևում իրավիճակին և արձագանքում է ՄԱԿ-ի գլխավոր քարտուղարի վերջին կատարված հայտարարություններին»,- 168.am-ի հետ զրույցում ասաց ՄԱԿ-ի Պարենի համաշխարհային ծրագրի հայաստանյան գրասենյակի հաղորդակցության բաժնի ղեկավար Գոհար Սարգսյանը:
Գոհար ՍԱՎԶՅԱՆ
Նյութն ամբողջությամբ՝ սկզբնաղբյուր կայքում
