Արցախի Հանրապետության Ազգային Ժողովի պատգամավորներ Արթուր Հարությունյանը, Դավիթ Մելքումյանը և պետնախարարի խորհրդական Գրիգորի Մարտիրոսյանը հանդիպումներ են ունեցել մի քանի գյուղի բնակիչների հետ, Պողոսագոմերում նրանք ներկայացրել են ստեղծված իրավիճակն ու աշխատանքները, որոնք օպերատիվ շտաբն իրականացնում է ճգնաժամը մեղմելու նպատակով, հայտնում է Արցախի հանրային հեռուստատեսությունը:
«Շատ կարևոր է, որպեսզի մենք ստեղծված իրավիճակում ունենանք մեր ներքին համերաշխությունը, բոլորս էլ հասկանանք, որ մենք այնպիսի իրավիճակում ենք, որ միասնության և համերաշխության մթնոլորտում կարող ենք այս մարտահրավերները հաղթահարել »,-ասել է ԱՀ ԱԺ պատգամավոր Արթուր Հարությունյանը:
Պատգամավորների և գործադրի ներկայացուցիչների հետ հանդիպումների ընթացքում հետաքրքրվել են բնակչությանը մտահոգող խնդիրներով, առաջնայինն, իհարկե վերաբերվել է անվտանգությանը: Պողոսագոմերի բնակիչներից Միշա Դավթյանն ասել է, որ ճիշտ չի լինի հույսը դնել ուրիշների վրա, պետք է համախմբվել առաջնահերթ դաշնակցի՝ ռուս խաղաղապահների հետ և դուրս գալ այս իրավիճակից:
«Որոշ ապրանքատեսակաների պաշար ունենք, բայց և բնակչությունը պետք է ըմբռնումով մոտենա և խնայողաբար օգտագործի, քանի որ դեռ պարզ չէ, թե շրջափակումը որքան կշարունակվի»,-դրմբոնցիների հետ հանդիպմանն ընդգծել է Արթուր Հարությունյանը: Նրա խոսքով, առաջիկա գարնանացան մշակաբույսերի մշակման դեպքում կլինեն լրացուցիչ պաշարներ: «Պարենային անվտանգության մասով կան ապրանքատեսակներ, որ չկան, բայց ապրանքատեսակներ էլ կան, որ ունենալու ենք և մեզ բավարարելու է երկարաժամկետ կտրվածքով էս շրջափակումը հաղթահարելու համար»,-վստահեցրել է պատգամավորը:
Կարդացեք նաև
Պարենի խնդիր դրմբոնցիներն առայժմ չունեն, բայց վառելիքի հարցն այստեղ էլ է սուղ: Դրմբոնցի Ջիվանշիր Հակոբյանի վստահեցմամբ, գյուղացին իր ամբարած մթերքով դեռևս պարենի խնդիր չունի, բայց վառելիքի խնդիրը լուրջ է
Կոճողոտցիների հետ հանդիպմանը պատգամավորները հորդորել են զերծ մնալ հակառուսական քայլերից՝ դա լինի ակցիաների տեսքով, թե սոցիալական ցանցերում գրառումների տեսքով: Արթուր Հարությունյանը վստահեցրել է, որ դեկտեմբերի 12-ից պաշտոնական, թե ոչ պաշտոնական ձևաչափով 4 հանդիպում են ունեցել ՌԴ խաղաղապահական զորակազմի հրամանատարության հետ, ներկայացրել են պաշտոնական Ստեփանակերտի տեսակետը՝ կապված շրջափակման հարցի հետ:
«Իհարկե, մենք նաև հասկանում ենք, որ այստեղ ավելորդ լարվածություն չստեղծելու համար են փորձել հարցին այսպիսի լուծում տալ, բայց ժամանակի ընթացքում պետք է լինելու ավելի կտրուկ քայլերի դիմել, որովհետև այսպիսի շրջափակումը կարող է հետագայում վերածվել հումանիտար աղետի»,-նշել է պատգամավոր Հարությունյանը: Պատգամավորները հորդորել են չտրվել սոցիալական ցանցերում ֆեյք-հրապարակումներին , նրանց խոսքով թշնամին տեղեկատվական պատերազմ է սկսել և հսկայածավալ աշխատանք է իրականացնում: Հերթական ապատեղեկատվությունն էլ վերաբերել է Ստեփանակերտի բնակչության տարհանման վերաբերյալ:
Արցախի հանրային հեռուստատեսության փոխանցմամբ, կոճողոտցիներին ոչ այնքան ներկան է մտահոգում, որքան որ ապագան, իրենց սերունդների ապագան Արցախում: Ինչ վերաբերում է ադրբեջանական սադրանքներին՝ կոճողոտցիները ևս մեկ անգամ վստահեցրել են, որ արցախցին իր հողում ապրել է դարերով և շարունակելու է ապրել:
Օպերատիվ շտաբի անդամները հայտնել են, որ մինչև հունվարի 10-ը նմանատիպ հանդիպումներ են ունենալու Արցախի բոլոր բնակավայրերում:
