12-ամյա Արկադին Կապանի թիվ 3 դպրոցում է սովորում։ Ձմեռային արձակուրդի առաջին իսկ օրն էլ Ներքին Հանդ է եկել՝ տատիկի ու պապիկի մոտ։ Ծնողներն էլ եկել․ 2023 թվականը այստեղ են դիմավորելու։ «Ինչի՞ց վախենամ, կրակոցներ են էլի, մեկ-մեկ ձայներ են լսվում, բայց գյուղում հետաքրքիր է»,-ասում է Արկադին։
Սեպտեմբերի 13-ի ադրբեջանական ագրեսիայից հետո Ներքին Հանդը հայտնվել է թշնամու ուղիղ դիտակետում։ Մի քիչ կյանքը փոխվել է՝ ավելի զգույշ են դարձել, բայց ապրում են իրենց առօրյայով։ «Իսկ ո՞վ է ասել, որ չպետք է սեղան բացենք, մի-մի բաժակ խմենք, թուրքն էլ տեսնի՝ տրաքվի»,-ասում է Հասմիկ Ղազարյանը։
Գյուղի համար վտանգավոր օրերին էլ չի լքել գյուղը․ ամուսնու, տղայի ու հարսի, թոռան հետ է ապրում։ Կապանից մյուս որդին էլ է եկել երեխաների հետ, որպեսզի 2023-ը միասին դիմավորեն։
Կարդացեք նաև
«Պատրաստվել ենք,նշելու ենք, բայց դե ամեն տարվա նման ճոխ չի։ Ասում են՝ տարին պիտի լավ դիմավորես, որ ամեն ինչ լավ լինի»,-ասում է տիկին Հասմիկը։ Ներքին Հանդեցիներն առաջինը խաղաղության ու նահատակված տղաների կենացն են խմում։ «Մենք տեսել ենք սեպտեմբերի 13-ը, տեսել ենք վիրավորներ տառապանք էր մեզ համար, չենք մոռանա երբեք»,-ասում է մեր զրուցակիցն ու հավաստիացնում, որ Ներքին Հանդը երբեք չեն լքի։
«Միշտ մեր տներից պիտի ծուխ դուրս գա, որ հեռվից տեսնեն՝ նախանձեն․ասեն՝ ինչքան ուժեղ են հանդեցիք»,-մի քիչ ձայնը բարձրացնելով ասում է տիկին Հասմիկը՝ կարծես լսեցնել տալով դիմացի բարձունքում գտնվող հակառակորդին։
2023թ․-ից էլ տիկին Հասմիկը ամենից առաջ խաղաղություն է ուզում ու այնպես լինի, որ Ներքին Հանդում կյանքը դառնա նախկինի պես։
Մարզային իշխանության ներկայացուցիչներն են դեկտեմբերի 30-ին եղել Ներքին Հանդում, հանդիպել բնակիչների հետ։ Սյունիքի մարզպետ Ռոբերտ Ղուկասյանը դստեր՝ Աիդայի հետ է այցելել սահմանամերձ Ներքին Հանդ։ Գյուղացիները բոլորին հրավիրում են հաջորդ օրը միասին նշելու տոնը։ «Գյուղամեջում սեղան ենք բացելու՝ երգենք, պարենք։ Թող դիմացից թշնամի նայի ու վախենա»,-ասում են գյուղացիները։
N զորամասի հրամանատարից թույլտվություն են հարցնում՝ կարո՞ղ են հրավառություն կազմակերպել։ Հրամանատարը մերժում է անվտանգային հարցերից ելնելով։ Չեն ընկճվում՝ այլընտրանքային տարբերակ ունեն։ «Իսկ մի քանի հազար փուչիկ կարո՞ղ ենք տրաքացնել»,-կես կատակ, կես լուրջ հարցնում են հանդեցիները՝ առաջարկելով հրաժեշտից առաջ խմել իրենց թորած տնական- մաքուր օղին։
Ներքին Հանդեցիների միջոցառումից մեկ դրվագ՝ այստեղ։
Ի դեպ, Ներքին Հանդում իրականացվում է գյուղատնտեսական զարգացման ծրագիր, որի արժողությունը 25 մլն դրամ է։ Բնակիչները հնարավորություն ունեն ընդլայնելու և զարգացնելու իրենց տնտեսությունները։
Այս մասին ավելի մանրամասն կներկայացնենք առաջիկայում։
Արմեն ԴԱՎԹՅԱՆ
