Սա մեր կառավարության վերջին նիստն է այսօր և շատ կարևոր է, որ մենք այս որոշմամբ լավ նվեր ունենք Իջևանի, Դավթաշենի, Արտաշատի և Մարտունու երեխաներին, կառավարության այսօրվա նիստի ընթացքում ասաց Նիկոլ Փաշինյանը՝ մինչ ձայնը կփոխանցեր ՀՀ ԿԳՄՍ նախարար Ժաննա Անդրեասյանին:
ԿԳՄՍ նախարարը ներկայացրեց մարզական նշանակության կառույցների կառուցման և վերանորոգման ծրագիրը, որում ընդգրկված են 6 հաստատություններ, մասնավորապես, պետական բյուջեի շրջանակում կառուցվում է Արթուր Ալեքսանյանի անվան հունահռոմեական ըմբշամարտի մանկապատանեկան դպրոցը: Բացի այս, աշխատանքներ են իրականացվում Հեծանվային սպորտի օլիմպիական մանկապատանեկան մարզադպրոցում, Գեղարվեստական մարմնամարզության մարզադպրոցում։ Երևանի օլիմպիական հերթափոխի պետական մարզական քոլեջում արդեն իսկ ավարտվել են աշխատանքները, կառուցվում է նաև Արմավիրի մարզի Ջրառատ համայնքում Սիմոն Մարտիրոսյանի անվան ծանրամարտի մարզադպրոցը։
«Այսօրվա նախագիծն աննախադեպ է, որովհետև մինչ այս ՀՖՖ-ին և ֆուտբոլին աջակցումը նման ծավալով չի իրականացվել և այս նախագծով առաջարկում ենք 2022 թվականի բյուջեն ավելացնել 2.5 մլրդ դրամով, և այդ միջոցներն ուղղել ՀՀ-ում ֆուտբոլի ենթակառուցվածքների զարգացման ծրագրին պետական աջակցություն տրամադրելուն»,-ասաց Ժաննա Անդրեասյանը։
Նախարարը նշեց, որ նախատեսվում է կառուցել ֆուտբոլի 4 դպրոց Երևանի, Արարատի, Գեղարքունիքի և Տավուշի մարզերում։ Ընդհանուր առմամբ, ծրագրի արժեքը կկազմի 5 միլիարդ դրամ:
Կարդացեք նաև
Մանրամասները՝ տեսանյութում
Լուսինե ՄԱՐԳԱՐՅԱՆ
