«Այս փոփոխությունը նշանակում է, որ որևէ մեկը չի՞ կարող հրապարակայնորեն կոչ անել Հայաստանի Հանրապետություն` որպես պետություն գոյություն չունենալու մասին և ընդհանրապես ինքնիշխանությունը նսեմացնելու և դրան ուղղված գործողություններ իրականացնելու». այսօր ՀՀ կառավարության նիստին, Նիկոլ Փաշինյանը նման հարց տվեց Արդարադատության նախարար Գրիգոր Մինասյանին, երբ նա ներկայացնում էր ՔՕ-ի նոր փոփոխությունները:
«Այո», – պատասխանեց Գրիգոր Մինասյանը` միաժամանակ հիշեցնելով, որ գործող Քրեական օրենսգրքով արդեն իսկ քրեական պատասխանատվություն է սահմանված ՀՀ տարածքային ամբողջականությունը խախտելուն ուղղված կոչերի ու գործողությունների համար, ուստի նոր կարգավորումը լինելու է այդ հանցագործությունների շղթայի տրամաբանական շարունակությունը։
Նշենք, որ ՀՀ կառավարությունը Քրեական օրենսգրքում նոր փոփոխություն է առաջարկում, որով պատասխանատվություն կսահմանվի ինքնիշխանությունից հրաժարվելու կոչեր հնչեցնելու համար։
Օրինագիծը ներկայացնելիս՝ ՀՀ արդարադատության նախարարը նշեց, որ գործող օրենսգրքով պատասխանատվություն է սահմանված սահմանադրական կարգը տապալելու համար, մինչդեռ ինքնիշխանությունից կամավոր հրաժարվելու կամ բռնի պարտադրելու կոչերի համար քրեական պատասխանատվություն նախատեսված չէ, թեև ինքնիշխանությունը պետության հիմնական հատկությունն է։
«Նախագծի ընդունման արդյունքում քրեորեն պատժելի արարքներ են համարվելու ինքնիշխանությունից հրաժարվելուն` բռնություն գործադրելու կամ բռնություն գործադրելու սպառնալիքի միջոցով Հայաստանի Հանրապետության ինքնիշխանությունը լրիվ կամ մասնակի սահմանափակելուն ուղղված գործողություններ կատարելը, ինչպես նաև ինքնիշխանությունից հրաժարվելուն ուղղված հրապարակային կոչերը»,– պարզաբանեց Մինասյանը։
Կարդացեք նաև
Նախագծով առաջարկվում է ինքնիշխանությունից հրաժարվելուն ուղղված հրապարակային կոչերի համար սահմանել տարբեր չափի տուգանքներից մինչև առավելագույնը 3 տարվա ազատազրկում, կոչերը տեղեկատվական տարբեր աղբյուրներով, ԶԼՄ–ներով տարածելու համար` 2-5 տարվա ազատազրկում։ Իսկ ինքնիշխանությունից հրաժարվելուն ուղղված տարբեր բռնի գործողություններ կատարելու համար առաջարկվու է սահմանել 10-15 տարվա ազատազրկում։
Մանրամասները՝ տեսանյութում
Լուսինե ՄԱՐԳԱՐՅԱՆ
