2023 թվականից Գյումրու 85-ամյա ծննդատանը կգործի արհեստական բեղմնավորման ծառայություն, որն, անխոս, կփոխի ժողովրդագրական պատկերը Շիրակի մարզում։
Այն բացառապես իրականացվելու է անվճար՝ անպտղության հաղթահարման պետական ծրագրի շրջանակներում։
Օրերս առողջապահության փոխնախարար Արտակ Ջումայանն և «Գյումրու բժշկական կենտրոն» ՓԲԸ գործադիր տնօրեն Արմեն Իսահակյանը քննարկել են ռազմավարությունը։
Արմեն Իսահակյանի փոխանցմամբ, այս ծրագիրը եղել է ՀՀ վարչապետ Նիկոլ Փաշինյանի հանձնարարականով։ Վարչապետը դեկտեմբերի 13-ին հանձնարարել էր մշակել անպտղության հաղթահարման պետական ծրագիրը 100 տոկոսով ընդլայնելու առաջարկներ։ Շիրակն առաջինն է Հայաստանի Հանրապետության մարզերից, որտեղ կատարվելու է արտամարմնային բեղմնավորում։
Կարդացեք նաև
Ըստ մեր զրուցակցի, ծառայությունը ոչ միայն հասանելի է լինելու գյումրեցիներին ու շիրակցիներին, այլ Լոռու ու Արագածի մարզերի բնակիչներին։ Այն նախատեսված է հատուկ կարգ ունեցողների համար, նրանց ցանկը կհրապարակվի Նոր Տարին սկսվելուն պես։
Արմեն Իսահակյանը նշեց նաև, որ այս ծառայության համար իրենք պատրաստվում են ձեռք բերել նորագույն սարքավորումներ՝ կառավարության և մյուս գործընկերների օժանդակությամբ։
Հիշեցնենք, որ ՀՀ կառավարության որոշմամբ՝ «Գյումրու ծննդատուն» ՓԲԸ-ն միավորվել է Գյումրու ԲԿ-ի հետ և գործում է որպես մանկաբարձագինեկոլոգիական բաժանմունք։
«Մենք Առողջապահության ազգային ինստիտուտի մանկաբարձագինեկոլոգիայի և ռեպրոդուկցիայի ամբիոնի վարիչ Էդուարդ Համբարձումյանի հետ պայմանագիր ենք կնքել առ այն, որ Գյումրիում կունենանք մասնաճյուղ և կլինիկական օրդինատուրայում սովորող ուսանողները իրավունք կստանան իրենց պրակտիկան անցկացնել մեր մանկաբարձագինեկոլոգիական բաժանմունքում։
Մեր ծննդատան 85-ամյակի առիթով սա ամենամեծ նվերն է, Գյումրու ծննդատունը հանդիսացել է դարբնոց Շիրակի մարզի բոլոր մանկաբարձ-գինեկոլոգների համար, այն նաև մեթոդական կենտրոն է, որտեղ տասնապատիկ անգամ ավելացել են գինեկոլոգիական բարդ վիրահատությունների թիվը, կատարվում են օնկո վիրահատություններ։ Ավելացրել ենք նաև վճարովի ծառայությունների թիվը, ավելացել է ծնունդների թիվը։ Այս բոլոր ձեռքբերումների ֆոնին նման ծառայություն ունենալը համարում են ամենակարևոր ձեռքբերումը»,-ասաց Արմեն Իսահակյանը։
Հիշեցնենք, որ փակվելու վտանգի տակ գտնվող, պարտքերի մեջ թաղված Գյումրու ծննդատունը Գյումրի բժշկական կենտրոնին միավորվելուց հետո վերանորոգվեց, անճանաչելի դարձավ ու կտրուկ ավելացան ծնունդների թիվը։
Նունե ԱՐԵՎՇԱՏՅԱՆ
