«Սա երախայրիքն է հայերի համար, որ առայժմ Բերձորի ճանապարհն է փակ, հետո կփակվեն Լոռվա ճանապարհները, ապա Գեղարքունիքի… Բոլոր ճանապարհներն են փակվելու, որովհետեւ էրդողանյան իշխանություններն իսկապես կարողանում են այստեղ ճիշտ ծառայել իրենց տերերին», – «Հայելի» ակումբում նշեց հերոս Վաչագան Մանուկյանի հայրը՝ բանաստեղծ Խաչիկ Մանուկյանը:
«Վերջերս համացանցում տեսա, թե ինչպես էր այս երկրում որպես նախագահ հանդես եկողը հիացական խոսում նվաճումներից, առաջընթացներից: Սկզբում զարմացած լսեցի, հետո հիշեցի, որ սրանք հետապնդում են թուրքական շահեր: Որեւէ խոսք չկար, որ մեր հայրենակիցները շրջափակված են, հայ զինվորների մարմինները մնում են սահմանին, Ջերմուկի արվարձաններում, ունենք հավատալով այսօրվա իշխանություններին պայքարի են ելել, սակայն նրանց վերադարձը չեն կարողանում ապահովել…
Մի առիթով ասել եմ, որ մենք նման ենք մոլորակի տարբեր հատվածներում հայտնվող թափառախմբի, եւ այն խոսքերը, որ հնչեցնում են այստեղից կամ այնտեղից, թե՝ դատապարտում ենք, ծաղրի պես են հնչում: Հետո էլ կդատապարտեն, կասեն՝ գիտեք, մենք դատապարտում էինք, բայց հայ ժողովուրդը վերացավ, Հայաստանը վերացավ, այլեւս բան չունենք դատապարտելու: Թուրքերն իրենց ախորժակը բացել էին, բայց մենք ի՞նչ անենք, հայոց իշխանություններն էին մտնում այդ երախը:
Երբեմն, ոմանք ասում են՝ ավելի լավ է թուրքի հետ, քան ռուսի: Բայց ավելի լավ է ինքներս մեզ հետ: Մենք պիտի նայենք Հայաստանի շահերից բխող իրականությանը, ոչ թե լավ է էստեղ կամ լավ է էնտեղ: Ամենալավը Հայկ Նահապետի ժառանգորդ լինելն է, ինքնիշխան հայի, որին շրջանցում ենք:
Կարդացեք նաև
Շատ տխուր է, որ այս իրականության մեջ ենք հիմա, նայում ենք մեր ծաղրված վիճակին, չենք էլ կարողանում իրար ասել՝ շնորհավոր Նոր տարի, չենք կարողանում, որովհետեւ շրջանցեցինք այն քաջերի, հաղթականների սխրանքը, դրա համար էլ հիմա գնում ենք ամլության ու պարտությանն», – նշեց Խաչիկ Մանուկյանը:
Գոհար ՀԱԿՈԲՅԱՆ
