Երեւանի քաղաքապետարանը նախագիծ է ներկայացրել կառավարություն, որով նախատեսվում է երեւանցիների վճարումները թվայնացնել։ Այս մասին այսօր Երեւանի ավագանու նիստում ասաց քաղաքապետ Հրաչյա Սարգսյանը։ Նրա փոխանցմամբ՝ նախագիծը դեռ չի հաստատվել, սակայն դրանով նախատեսվում է, որ հաստատվելուց հետո մրցույթ կհայտարարվի եւ համատիրության ամբողջ գործառույթները կտեղափոխվեն առցանց հարթակ․ «Այդպիսով քաղաքացիները կկարողանան հեռախոսով համատիրությունում տեղի ունեցող գործընթացները հետեւել, ժողովների մասնակցել, քվեարկել, ծախսերի ուղղությունները տեսնել»։
Նա ասաց, որ Երեւանում 4700-ից ավելի բազմաբնակարան շենք կա, եւ քաղաքապետարանը չի կարող 4700 քաղաքացիների բաժնային սեփականություն հանդիսացող գույքի նկատմամբ կառավարում իրականացնել․ «Դա ճիշտ չէ։ Քաղաքացին էլ պետք է պատասխանատվություն վերցնի իր վրա։ Չի կարող քաղաքացին նստի տանը, ու ասի՝ համատիրությունը չի աշխատում։ Օքեյ, բայց մենք ունենք համատիրություններ՝ նորակառույցների, որոնք այս գործող օրենքով ոնց որ վատ չեն աշխատում»։
Նելլի ԲԱԲԱՅԱՆ
