Ասում է բանաստեղծ, արձակագիր, թարգմանիչ, ՀԳՄ նախագահության անդամ Գոհար Գալստյանը
– Ի՞նչ է պոեզիան բանաստեղծի եւ ընթերցողի համար…
– Բանաստեղծի համար պոեզիան իր հոգու մեղվանոցի անխառն զտածոն է, իր ոգենյութը, որը բաշխվելով բազմապատկվում է։ Պոեզիայի մարմինը հազարավոր ապրումների ու մտածումների բառ համատեքստ է, ուր ամեն թրթիռի մեջ բանաստեղծի արյան կոդերն են, որտեղ նրա սիրտն է տրոփում։
Ընթերցողի համար պոեզիան առաջին հերթին հենց հոգեւոր սնունդ է, միաժամանակ՝ հրաշագործ մի հայելի, որի ընդերքում պարփակ լույսը (ընթերցումով լինի, թե՝ ունկնդրելով), երբ բացահայտվում է՝ դիպչելով քո ներքին աղբյուրներին, ի զորու է ընդարձակել հոգուդ տեսադաշտը, միանգամից քոնը դարձնելով այն, ինչը դեռ չգիտեիր, բայց՝ թվում է, թե միշտ է եղել քոնը։
– Նոր մտածողություն, ոճ, տրամաբանություն եւ տրամադրություն… այսօրվա գրական ընթացքի մասին։
Կարդացեք նաև
– Այո, «նոր մտածողություն»՝ ճանաչողության կերպ, «նոր ոճ» – սրանք պոեզիայի հագուստներն են՝ միանգամայն տեղին, «տրամաբանություն եւ տրամադրություն»՝ պոեզիայի խելքն ու բնավորության գծերը, բայց շատ զիլ մտածողությունն ու խոսքի ոճը դեռեւս պոեզիա չէ, ինչպես որ՝ տրամաբանված խոսքն ու տրամադրությունը… Այսօրվա գրական ընթացքը ե՛ւ բազմադեմ է, ե՛ւ բազմադիմակ…
– Բաներ կան, որոնք գրվում են անհրաժեշտաբար… Բայց ժամանակը ստվեր գցելու հմտություն ունի։ Ստվերի խորհուրդը կամ բացասական կողմը…
– Միշտ են եղել բաներ, որ ժամանակի զարկերակի ռիթմով են գրվում, բայց դրանց ստվերի ենթակա լինելու պայմանը տարբեր է։ Ի վերջո, ստվերը լույսի անկյան տակ տարբեր է լինում, եւ շատ բնորոշ է, որ առարկան կամ մարդուն, նրա գործը «մեծացնելու» կամ հակառակը՝ նսեմացնելու նպատակով այն շահեկան կամ ո՛չ շահեկան լույսով մատուցվի։ Այսօրվա PR իրականության մոդելը հենց այդպիսին է։ Օպերատորները եւ լուսանկարիչները լավ կհասկանան՝ շահեկան ռակուրսով։ Այնինչ գաղտնիք չէ, որ ստվերը առարկային համարժեք է բնական լույսի համաչափության ներքո։
– Գաղափարից այն կողմ փնտրվող հիմքեր… Ի՞նչն է խանգարում այդ հիմքերը զարգացնելու համար։
– Հիմքերն արմատներում են։ Զարգացնելու համար պետք է առանցքը պահել եւ ձգտել դեպի լույսը՝ բարձրանալ եւ աճել… աճեցնելով եւ բարձրացնելով…
Զրուցեց Վովա ԱՐԶՈՒՄԱՆՅԱՆԸ
«Առավոտ» օրաթերթ
24.12.2022
