Պետք է դիտավորությամբ արված սխալը լուծել միայն ավտոտեսչությունում
Հայաստանում եւ ամբողջ աշխարհում երբ բարձրացավ ամեն ինչի գինը, մենք՝ ավտոսիրող վարորդներս, գոհ մնացինք ավտոտեսչությունից, որ գոնե տուգանքները չեն բարձրացել (քանի որ հաճախ ենք տուգանվում), բայց շատ սխալվել էինք, քանի որ ավտոտեսչությունը գտել էր այլ ելք ժողովրդին խաբելու եւ մեծ գումարներ կորզելու համար։ Օրինակ, կբերեմ մեր մեքենայի պատմությունը, որը կարծում եմ՝ վերաբերում է նաեւ բազմաթիվ մեքենաների վարորդների, որոնք բողոքում են բանավոր ձեւով։
«Infinity G35» մեր ավտոմեքենան արտադրվել է 2003 թ.-ին, Ճապոնիայում, այնուհետեւ ԱՄՆ-ից այն որպես օգնություն (էժան գնով գնված) ուղարկվել է Երեւան 2008թ.-ին։ Այդ օրվանից սկսած՝ 14 տարի որպես գույքահարկ վճարել եմ մեքենայի տեխնիկական անձնագրում նշված 162/220 ձիաուժին համապատասխան հարկ (այն ինձ տրվել է թաղապետարանում)։ Արտադրված մեքենայի ձիաուժը ուղարկված էր վերը նշված թվով, այն տեխանձնագրով հաստատվել էր նաեւ ԱՄՆ-ում եւ ուղարկվել Երեւան։ Այս տարվանից սկսած ինքնուրույնաբար պետավտոտեսչությունը, հաշվի չառնելով գործարանային արտադրության ձիաուժը, այն դարձրել է 260՝ թքած ունենալով մեքենան արտադրող գործարանի նշած տեխանձնագրի վրա։
Երբ բանավոր զրուցում եմ պետավտոտեսչության աշխատակիցների հետ, նրանք պատճառաբանում եւ արդարանում են, որ սկզբում իրենք սխալ են նշել. պետք է լիներ ոչ թե 162 ձիաուժ, այլ 260։ Եվ 14 տարի անց մեզ պարտադրում են վճարել նաեւ այդ 14 տարի առաջվա իրենց իսկ թույլ տված սխալի համար, որը կազմում է մի հսկայական գումար։ Այն ավելի շատ է, քան կիսակոռոզիայի ենթարկված 20 տարեկան ավտոմեքենայի ինքնարժեքը։ Թաղապետարանի աշխատակիցները զարմացած են մնացել ներկայիս հարկաբաժինը համեմատելով նախկինի հետ, բայց առարկում են, որ դա իրենց մեղքով չէ, այլ՝ պետավտոտեսչության նոր գնացուցակով է այդպես եւ պետք է դիտավորությամբ արված սխալը լուծել միայն ավտոտեսչությունում։ Տեխզննման կայանը նույնպես դիտավորությունը տեսնում է միայն ավտոտեսչության աշխատակիցների մեջ եւ իր հերթին հրաժարվում է տեխզննում կատարել, չնայած որ կատարել եմ 120.000 դրամի մուծում թաղապետարանում եւ տեխզննման կայանում։
Կարդացեք նաև
Իհարկե, գրավոր բողոք ուղարկեցի եւ պետավտոտեսչություն, եւ վարչության պետ Ե.Կարապետյանին պատվիրած նամակներով՝ նշելով, որ անպայման ինձ պատասխանեն գրավոր ձեւով եւ նաեւ նշելով, որ այդ հարցը լուծելու եմ դատական գործընթացով, տեղյակ պահելով նաեւ լրատվամիջոցներին։ Անցել է 1 ամիս, սակայն ոչ գրավոր, ոչ բանավոր պատասխան չեմ ստացել նրանցից։ Պարզ է, որ խարդախություն անողն իր խաբեության համար չի կարող արդարանալ, այն էլ գրավոր ձեւով։ Այժմ այդ հարցը պետք է լուծեմ դատարանի միջոցով՝ տեղյակ պահելով նաեւ դատախազությանը՝ քրեական գործ հարուցելու համար։
ՋԵՄՍ ՍՏԵՓԱՆՅԱՆ
55 տարվա ավտոսիրող վարորդ, թոշակառու բժիշկ,
սպառողների միության անդամ
«Առավոտ» օրաթերթ
23.12.2022
