Gallup International Association-ի Հայաստանում լիիրավ անդամ Էմ Փի Ջի ՍՊԸ տնօրեն Արամ Նավասարդյանը ներկայացրեց «Ռուս-Ուկրաինական հակամարտություն. հայացք Հայաստանից» հետազոտության երրորդ փուլի արդյունքները, ինչպես նաեւ անդրադարձավ ներհայաստանյան օրակարգին:
Հարցումն անցկացվել է դեկտեմբերի 5-ից 10-ն ընկած ժամանակահատվածում, ՀՀ քաղաքների եւ մարզերի 1100 քաղաքացիների շրջանում:
«Հարցումների ժամանակահատվածը չի ընդգրկել վերջին զարգացումները՝ Լաչինի շրջափակումը»,- տեղեկացրեց պարոն Նավասարդյանը:
Հարցման ամփոփումը ցույց է տվել, որ տարվա ընթացքում նկատելիորեն նվազել է վստահությունն ու հավատը գործող իշխանության, պետական կառույցների, բարձրաստիճան պաշտոնյաների եւ նրանց վարած քաղաքականության նկատմամբ:
Կարդացեք նաև
Մասնավորապես, երկրի տնտեսական վիճակը քաղաքացիների շուրջ 13 %-ն է նշել դրական տիրույթում, վատ համարել է շուրջ 34 %-ը, իսկ մոտ 54 %-ը գնահատել է միջին, ինչը նույն գոյատեւելն է:
ԱԺ-ի գործունեությանը ընդամենը 13,7 %-ն է միանշանակ հավանություն տվել, ՀՀ կառավարությանը՝ 16,1 %-ը, ՀՀ նախագահինը՝ 15,0 %-ը, իսկ վարչապետինը՝ 23,2 %-ը:
Հետաքրքիր թվեր են արձանագրվել նախարարների եւ նրանց ղեկավարած նախարարությունների եւ պետական կառույցների գործունեությունը 1-5 բալով գնահատելու ժամանակ: Արամ Նավասարդյանը տեղեկացրեց, որ հարցում իրականացնելու ժամանակահատվածում դեռեւս ազատված չէր ԿԳՄՍ նախարարը, իսկ ֆինանսների նախարարը դեռ չեր նշանակվել փոխվարչապետ: Շատ թե քիչ դրական տիրույթում գնահատական ստացել են 15 պետական կառույցներից միայն 7-ը: Զավեշտալի է, որ ամենացածր՝ 2,7, գնահատականի արժանացած ֆինանսների արդեն նախկին նախարար Տիգրան Խաչատրյանը դրանից հետո պաշտոնի բարձրացում է ստացել՝ նշանակվելով փոխվարչապետ: Համեմատության համար ասենք նաեւ, որ նախկինում արված հարցումների ընթացքում ավանդաբար ամենաբարձր գնահատական ստացել են հիմնականում ուժային կառույցները, սակայն նրանց վարկանիշը գնալով ընկնում է:
Հայաստանի հարցված քաղաքացիների կեսից ավելին՝ 51,5 %-ը դրական է վերաբերում Ռուբեն Վարդանյանի՝ Արցախի պետնախարար նշանակվելու փաստին, 21,0 %-ը դժվարացել է պատասխանել հարցին:
Կապված Ուկրաինայում ռազմական գործողությունների, Ռուսաստան-Ուկրաինա, Ռուսաստան- Արեւմուտք հարաբերությունների հետ, որոշակիորեն նվազել է Ռուսաստանի վարկանիշը, ինչը Արամ Նավասարդյանը մեկնաբանեց նաեւ վերջին տարիներին ու հատկապես վերջին շրջանում Հայաստանում հակառուսական քարոզչության կտրուկ ավելացման իրողությունով:
Աշոտ ՀԱԿՈԲՅԱՆ
