Ռուսաստանը հանդես է գալիս հայ-ադրբեջանական սահմանին առաջ եկած բոլոր վիճելի հարցերը դիվանագիտական միջոցներով կարգավորելու օգտին: Այս մասին հայտարարել է Ռուսաստանի արտգործնախարար Սերգեյ Լավրովը Ադրբեջանի իր գործընկերոջ հետ հանդիպմանը հաջորդած մամուլի ասուլիսում:
«Մենք կարծիքներ ենք փոխանակել հայ-ադրբեջանական սահմանին իրավիճակի կայունացման վերաբերյալ. մենք միասնական կարծիք ունենք, որ օպտիմալ լուծում կլիներ սահմանազատման գործնական աշխատանքների մեկնարկը. դրա համար ձևավորվել է համապատասխան երկկողմ հայ-ադրբեջանական հանձնաժողով, կողմերը համաձայնել են, որ այն պետք է աշխատի Ռուսաստանի խորհրդատվական աջակցությամբ»,- ասել է Լավրովը:
Ընդ որում, նա կարևորել է այդ մեխանիզմի լիարժեք կայուն աշխատանքի ապահովումը, ուժի կիրառումից զերծ մնալը և բոլոր վիճելի հարցերը բացառապես դիվանագիտական միջոցներով լուծելը:
Լավրովը նաև նշել է, որ Բայրամովի հետ քննարկել է նաև Լաչինի միջանցքում ստեղծված իրավիճակը:
Կարդացեք նաև
«Մենք հաստատել ենք, որ ռուս խաղաղապահներն աշխատում են բառացիորեն ամեն ժամ իրավիճակի կարգավորման համար՝ կապ պահպանելով համապատասխան կողմերի հետ: Մենք հանդես ենք գալիս այն բանի օգտին, որպեսզի հնարավորինս արագ վերականգնվի լիարժեք տրանսպորտային հաղորդակցությունը և լուծվեն տարաձայնությունները տարածաշրջանի հանքերի շահագործման վերաբերյալ»,- ասել է Լավրովը:
Նրա խոսքով՝ Ռուսաստանը ելնում է նրանից, որ բոլոր կողմերը պետք է հավատարիմ մնան իրենց պարտավորություններին, որոնք արձանագրված են Հայաստանի, Ադրբեջանի և Ռուսաստանի ղեկավարների 2020թ. նոյեմբերի 9-ի հայտարարության մեջ: «Մեր Ադրբեջանցի գործընկերները, որքան հասկանում են, նույնպիսի դիրքորոշում ունեն»,- ասել է նա:
Պատրաստեց Վիկտորյա ԱՆԴՐԵԱՍՅԱՆԸ
