«Արտակարգ դատարաններից, ձեր մեքենաների արագությունից թույլ տվեք ձեզ բերել իրական օրակարգ»,- ՀՀ ԱԺ արտահերթ նստաշրջանի լիագումար նիստի ժամանակ հայտարարեց ՀՀ ԱԺ «Հայաստան» խմբակցության պատգամավոր Աղվան Վարդանյանը։
Նա փաստեց․ «Արցախը շրջափակված է։ Քարվաճառը հանձնված է։ Երկրորդ ճանապարհը չկա։ ՔՊ-ի խոստացած երրորդ՝ Կապան-Ջրական-Ջաբրայիլ ճանապարհը, կարծեմ, չի կառուցվել։
Հիմա էլ՝ Բերձոր-Լաչինի միջանցքը։ Որ, կարծեմ, նախկիններն էին բացել։
Ծայրահեղ սահմանային իրավիճակ։
Կարդացեք նաև
Նոր բան չէ։ 1990-92-ին էլ էր Արցախը շրջափակված բոլոր կողմերից։ Հայաստանի հետ միակ կապը՝ ուղղաթիռն էր։
Բայց կա մի աննշան տարբերություն։ Այն ժամանակ եւ Արցախում, եւ Հայաստանում իշխանություն կար։ Երկուսի նպատակը նույնն էր. անկախ պետականություն եւ Արցախ։ Արցախը իբրեւ անկախ պետականության հիմք։
Հիմա Հայաստանում ՔՊ իշխանություն է։ Առանց պետական մտածողության, առանց Արցախի։ Իշխանություն՝ իշխանության համար։
Արցախում նույն վիճակն է։ Կամ՝ սրա ածանցյալը։ Նաեւ խառն են։
Ու, բնականաբար, չկա համախմբում, չկա քաղաքական, պետական կամք ճգնաժամը հանգուցալուծելու։
Միակ քաղաքականությունը՝ խնդրել ուրիշներին, որ մեր օգտին մի բան անեն։ Մուրացկանություն։ Մուրացկանին չեն հարգում, խղճում են։ Օգնեն էլ՝ մուրացկան է մնալու։
Այսինքն՝ պետություն չկա, որ իրեն պարտադրի, որ իր շահը դարձնի այլոց շահը։
Բայց երկու լավ նորություն ունեմ։
1.Ինչպես 90-ականներին, ապաշրջափակվելու ենք։ Բոլոր առումներով։ Հայաստանը, Արցախը տարածաշրջանում գործոն են դառնալու։
2.ՔՊ չի լինելու»։
ՀՀ ԱԺ նախագահ Ալեն Սիմոնյանն այս ելույթից հետո ասաց․ «Պարոն Վարդանյան, տպավորություն է՝ 2007-ի ելույթ էր․ դարակից հանել էինք, ընթերցեցիք, որովհետև ինչ ասում եք, ճիշտ եք ասում, բայց 2006-2007-ին էր վերաբերում»։
Տաթև ՀԱՐՈՒԹՅՈՒՆՅԱՆ
