Լաչինի միջանցքում ծավալվող իրադարձությունների հետ կապված՝ հասարակության կողմից հարցադրումներ են հնչում, թե ինչո՞ւ է պասիվ դիրքորոշում որդեգրել հայկական Սփյուռքը, ինչո՞ւ այնպես, ինչպես Հայաստանում, բողոքի ցույցեր չեն կազմակերպվում տվյալ երկրների դեսպանատների ու միջազգային կառույցների գրասենյակների դիմաց:
Հարցադրումը ուղղեցինք Արա Աբրահամյանի գլխավորած Ռուսաստանի հայերի միության մամուլի ծառայությանը: Պատասխանը հետևյալն էր.
«Լաչինի միջանցքում ծավալած Ադրբեջանի սադրիչ և հակամարդկային գործողությունների մասին իր պաշտոնական տեսակետը Ռուսաստանի հայերի միությունը հայտնել է հատուկ հայտարարությամբ: Այն հրապարակվել է մամուլում:
Միաժամանակ հայտնում ենք, որ մենք զբաղված ենք, ինչպես և անցյալում, մասշտաբային հումանիտար, նաև նախատոնական օգնության կազմակերպմամբ, որը ուղարկվում է Հայաստան և Արցախ: Այս օրերին ավելի քան տասը տոննա բեռ ճանապարհ է ընկել:
Կարդացեք նաև
Ի՞նչ բողոքի ակցիաների մասին է խոսքը, մեզ համար հասկանալի չէ: Մոսկվայում ո՞ւմ դեմ պետք է բողոքի ակցիա անել: Այն բանի դե՞մ, որ ռուս խաղաղապահները ամեն հնարավորը անում են, որպեսզի Ղարաբաղում չվերսկսվեն ռազմական գործողությունները, թե՞ Գազպրոմի, որը հինգ անգամ ավելի ցածր գնով Հայաստանին գազ է մատակարարում, ի համեմատ մյուս երկրների:
Այն, այսպես կոչված հայկական գործիչները, որպես կանոն կասկածելի կողմնորոշում ունեցող, և ոչ միայն քաղաքական իմաստով կասկածելի կողմնորոշում, որոնք իբրև թե դժգոհ են հայկական համայնքի գործունեությունից, նույնպիսի սադրիչներ են, ինչպիսիք են ադրբեջանցի «բնապահպանները», որոնք արգելափակել են Կյանքի ճանապարհը: Այդ երկու խմբերն էլ ունեն մեկ ընդհանուր հովանավոր ու լարախաղաց:
Ռուսաստանի հայերի միությունը երբեք չի ենթարկվել անբանների ու սադրիչների տրամադրություններին ու չի ենթարկվելու:
Իսկ եթե ինչ-որ մեկը իր էներգիան ծախսելու տեղ չունի, ապա թող դուրս գա վիրտուալ իրականությունից ու սոցիալական հարթակներից և, մենք նրան կօգնենք գտնել իրեն կամավորական ինքնաարտահայտման գործում՝ ի նպաստ արցախահայության, Հայաստանի, Սփյուռքի և հայ-ռուսական հարաբերությունների ամրապնդման»:
Նաիրա Բաղդասարյան
Մոսկվա
