«Ազգային ժողովրդավարական բեւեռն» այսօր Հայաստանում ՄԱԿ-ի գրասենյակի առջեւ կարճատեւ ցույց էր կազմակերպել: Ցուցարարների մի խումբ կրում էր ՄԱԿ-ի խաղաղապահների խորհրդանշական հանդերձանք եւ վանկարկում էին «Հայաստանին՝ իրական դաշնակից, Արցախին՝ ՄԱԿ-ի խաղաղապահ» կարգախոսները:
ԱԺԲ երիտասարդական թեւի ներկայացուցիչ Սոնա Մխիթարյանը ընթերցեց ՄԱԿ-ին հասցեագրված նամակը եւ այն հանձնեց հայաստանյան գրասենյակի ներկայացուցչին: Հետո Սոնա Մխիթարյանն Aravot.am-ին ասաց. «Բերձորի միջանցքն արդեն ավելի քան տասն օր փակ է եւ Հայաստանը Արցախի հետ չի կարողանում կապ հաստատել: Այնտեղ կան բազմաթիվ հիվանդներ: Նաեւ կենսական անհրաժեշտության պարագաների բաց կա, էլ չասենք, որ քաղաքացիական բնակչության կյանքին սպառնալիքի խնդիր է: Սակայն, փաստացի, թշնամի Ադրբեջանը եւ իբր ռուս խաղաղապահները ոչինչ չեն անում: Մենք ստիպված դիմում ենք միջազգային հանրությանը՝ հույս ունենալով, որ կմիջնորդեն եւ արցախահայության կյանքը կփրկվի: Այս բովանդակությամբ նամակն ընթերցեցինք եւ հանձնեցինք: Հույս ունենք, որ պատասխան կլինի»:
Դիտարկմանը, որ ՄԱԿ-ն անվտանգության խորհրդի նիստ գումարել է, Ադրբեջանի հասցեին եղել են քննադատություններ, սակայն օրեր են անցել, բայց Ադրբեջանը արհամարհում է նաեւ ՄԱԿ-ին, այսինքն, միջազգային հանրությունը հերթական անգամ բավարարվում է ընդամենը հայտարարություններով, Սոնա Մխիթարյանը պատասխանեց. «Շատ երկրների ներկայացուցիչներ, թեկուզ ԱՄՆ-ի, Ֆրանսիայի, հստակորեն նշել են, որ Բերձորի միջանցքը պետք է բացվի: Դիվանագիտական ճանապարհն էլ՝ դիվանագիտական ճանապարհ, բայց սա մեր պետությունն է եւ Հայաստանը պետք է դիմի միջազգային խաղաղապահներին, իսկ Հայաստանը չի դիմում: Իսկ ռուսական զորքը չունի մանդատ: Հետեւաբար, եթե Հայաստանը դիմի, չեմ կարող պնդել, բայց մենք վստահ ենք, որ միջազգային խաղաղապահ ուժեր կտեղակայվեն: Համենայն դեպս, պետք է պարտադրենք»։
Կարդացեք նաև
Աշոտ ՀԱԿՈԲՅԱՆ
