Դեկտեմբերի 26-ից մինչեւ 2023 թվականի փետրվարի 20-ը ներառյալ` հայտարարվում է ՀՀ ԶՈՒ պահեստազորի սպայական կազմում հաշվառված՝ մինչեւ 35 տարեկան արական սեռի բժիշկ-մասնագետների պարտադիր զինվորական ծառայության զորակոչ՝ երկու տարի ժամկետով: Որոշման նախագիծը ներառված է կառավարության այսօրվա նիստի օրակարգում՝ որպես չզեկուցվող։
Նախագծով սահմանվում է՝
1) պահեստազորի սպայական կազմի զորակոչի ենթակա անձանց թվաքանակը սահմանվում է մինչեւ 10 բժիշկ-մասնագետ
2) պահեստազորի սպայական կազմի զորակոչի շրջանակներում մինչեւ 2023 թվականի փետրվարի 20-ը, ներառյալ` զորացրել «Զինվորական ծառայության եւ զինծառայողի կարգավիճակի մասին» օրենքով սահմանված ժամկետում պահեստազորի սպայական կազմի պարտադիր զինվորական ծառայություն անցած զինծառայողներին:
Կարդացեք նաև
Նախարարությունների, պետական կառավարման այլ մարմինների եւ կազմակերպությունների (անկախ կազմակերպական-իրավական ձեւերից) ղեկավարների համար էլ, ըստ նախագծի, սահմանվում է՝ հայտարարված պահեստազորի սպայական կազմի զորակոչին չներկայացած կամ քրեական պատասխանատվության կանչված եւ հետախուզման մեջ գտնվող քաղաքացիների վերաբերյալ տվյալներ ստանալուց հետո նրանց նկատմամբ կիրառել աշխատանքային, տնտեսական ու այլ ոլորտներում` օրենքով նախատեսված սահմանափակումներ եւ գտնվելու վայրի մասին անհապաղ իրազեկել իրավասու պետական մարմիններին։
Այլ երկրներում գտնվող, հյուպատոսական հաշվառման կանգնած զորակոչին պարտադիր զինվորական ծառայության ենթակա եւ ՀՀ վերադարձող քաղաքացիների մասին տեղեկությունները, ըստ նախագծի, պետք է ներկայացվեն ՀՀ ՊՆ կամ զորահավաքային համալրման ծառայության պետին:
Նախագծով սահմանվում է, որ ոստիկանությունն ու ԱԱԾ-ն է պետք է զորակոչի ընթացքում ուժեղացնեն վերահսկողությունը ՀՀ սահմանային հաղորդակցության ուղիներում՝ զորակոչից խուսափելու դեպքերը կանխելու համար։
Նելլի ԲԱԲԱՅԱՆ
