«Մենք՝ հայաստանաբնակ հարյուր հազարավոր արցախցիների ներկայացուցիչներս, դիմում ենք ՄԱԿ-ին և պահանջում խտրականություն չդնել ազգերի, ժողովուրդների, պետությունների և պետականությունների միջև և միջազգային մեխանիզմների գործարկմամբ ապաշրջափակել ինքնորոշման իրավունք ունեցող Արցախի Հանրապետությունը»,- քիչ առաջ ՄԱԿ-ի հայաստանյան գրասենյակի մոտ հայտարարեց արմատներով արցախցի, հայաստանաբնակ Վանյա Բարսեղյանը։
Նա տեղեկացրեց՝ իրենց հայտարարությունը նամակով արդեն փոխանցել են ՄԱԿ-ի հայաստանյան գրասենյակի ղեկավարին։
Հայտարարության մեջ մասնավորապես ամրագրված է․ «Արցախի բնակիչները զրկվել են ազատ տեղաշարժի իրավունքից՝ համաձայն ՄԱԿ-ի մարդու իրավունքների համընդհանուր հռչակագրի 13-րդ հոդվածի։ Արցախը կանգնած է հումանիտար ճգնաժամի առաջ։ Արցախի իշխանությունները ստիպված հատուկ ռեժիմ են սահմանել էներգակիրների համակարգում և առողջապահական համակարգում։ Արդեն իսկ կան ծանր դեպքեր, երբ հիվանդների հետագա բուժումը պետք է շարունակվի կամ Երևանում կամ արտերկրում, որը, սակայն, շրջափակման պայմաններում անհնարին է։ Վերջացել կամ սպառվելու վրա են առաջին անհրաժեշտության ապրանքները և դեղամիջոցները։ Արցախի 1100 քաղաքացիներ, որոնցից 270-ը անչափահաս, տուն վերադառնալու հնարավորություն չունեն։ Ադրբեջանի այս վարքագիծը հերթական անգամ վկայում է պաշտոնական Բաքվի՝ Արցախի էթնիկ զտումների ենթարկելու քաղաքականության շարունակության մասին»։
Արցախցիները նաև պնդում են, որ Ադրբեջանը չի կատարում միջազգային պարտավորությունները, նոյեմբերի 9-ի փաստաթղթով ստանձնած պարտավորությունները՝ այդ թվում ուժի կիրառումից և ուժի կիրառման սպառնալիքից հրաժարումը, Լաչինի միջանցքով ազատ տեղաշարժի իրականացումը, որոնք առանցքային են տարածաշրջանում ժողովրդավարության, խաղաղ համակեցության համար։
Կարդացեք նաև
Տաթև ՀԱՐՈՒԹՅՈՒՆՅԱՆ
