ԱԺ արտահերթ նիստում, անդրադառնալով իշխանական պատգամավորների այն պնդումներին, որ 2020 թվականի նոյեմբերի 9-ի հայտարարությամբ Լաչինի միջանցքի պատասխանատուն ՌԴ-ն է, «Հայաստան» խմբակցության պատգամավոր Արթուր Խաչատրյանը մանրամասնեց՝ կա Գորիս-Ստեփանակերտ ճանապարհ եւ այդ ճանապարհի մի փոքր հատված, որը կոչվում է Լաչինի միջանցք. «Լաչինի միջանցքը, մինչեւ նոր փոփոխությունները, 10 կիլոմետրի չափ էր, Գորիս-Ստեփանակերտ ճանապարհը՝ 100 կիլոմետրի չափ, թուրքերը փակել են ճանապարհը ոչ թե Բերձորի մոտակայքում, այլ Ղարաբաղի ներսում՝ Շուշի-Քարինտակ հատվածում. Լիսագորից սկսած՝ արդեն որոշակի խնդիրներ կան, բայց թուրքերը վրանները դրել են Գորիսից բավականին հեռու: Հիմա դուք ի՞նչ եք առաջարկում, ասում եք՝ էդ ամբողջ ճանապարհը՝ Գորիսից-Ստեփանակերտ, դա՞ է ռուսական վերահսկողության տիրույթ. 5 կմ-ն այդքանի՞ն է վերաբերվում: Բա Եղծահող, որ գնում եք, 5 կմ-ից բավական այսկողմ է, թուրքերը նույն տրամաբանությամբ խփեցին՝ մտան Խծաբերդ, ասացին՝ 5 կմի-ից այնկողմ է: Հիմա այս ելույթը կարող են մեջբերել՝ ասել՝ Գորիսից որ դուրս ես գալիս Ստեփանակերտ, ընդամենը 5 կմ պետք է լինի, բա էս հարցին ո՞նց եք անդրադառնալու»:
Ըստ ընդդիմադիր պատգամավորի, եթե ՀՀ-ն շարունակում է պնդել, որ Արցախի անվտանգության երաշխավորն է, ուրեմն, ճանապարհի այդ հատվածն էլ ՀՀ-ի պարտավորությունների շրջանակում է, այլապես, երբ Խրամորթի դեպքերի ժամանակ կրկին պատասխանատվությունը դրվեց ռուսական կողմի վրա, հիմա էլ է դրվում, ապա ո՞րն է մեր պատասխանատվությունը՝ միայն պարտքով գումար տա՞լը:
Նա նաեւ պատասխանեց իշխանական պատգամավոր Վահագն Ալեքսանյանին՝ հորդորելով նախադասության սկզբից բացի՝ նաեւ վերջը կարդալ ու հստակեցրեց, որ ռուս խաղաղապահներին հայտարարության իրենց տեքստում զորակցություն էին հայտնել, քանի որ եթե 2020 թվականի նոյեմբերի 9-ին ռուս խաղաղապահները չմտնեին Ստեփանակերտ, այսօր այնտեղ ադրբեջանցիներ կլինեին:
Ավելի ուշ, իր ելույթում ԱԺ փոխնախագահ Ռուբեն Ռուբինյանը պնդեց, որ իրականում Լաչինի միջանցքը ձգվում է ՀՀ սահմանից մինչեւ Ստեփանակերտ եւ դա 2020 թվականի նոյեմբերի 9-ի հայտարարության 6-րդ կետում հստակ գրված է :
Կարդացեք նաև
ԱԺ պետաիրավական հարցերի հանձնաժողովի նախագահ Վլադիմիր Վարդանյանը ընդդիմությանը ծափահարեց եւ մեղադրեց ադրբեջանական ռազմաքաղաքական վերնախավի մեծագույն երազանքներից մեկը կատարելու մեջ. «Որոշ ժամանակ անց, Իլհամ Ալիեւի սեղանին կհայտնվի մի փաստաթուղթ, որում գրած է լինելու՝ հայերն իրար են մեղադրում, իրար ուտում են, պառակտում կա, սաղ տոչնի ա, միստր պրեզիդենտ»: Նա հայտարարեց, որ էլ այլեւս այն հին բարին չէ եւ խոստացավ պատճենահանել նաեւ իր հին անձնագրերը՝ ցույց տալու համար, որ ինքը որեւէ անգամ թուրքական հողի վրա ոտք չի դրել: Նաեւ բղավեց ընդդիմության վրա. «30 տարի Արցախի ճանաչման հարց ինչի՞ չէիք դրել, դնեիք»:
Մանրամասները՝ տեսանյութում
«Հայաստան» խմբակցության անունից իր եզրափակիչ ելույթում Արծվիկ Մինասյանն ասաց, որ իշխանությունն այսօր հերթական շոուն կազմակերպեց խորհրդարանում: «30 տարի Արցախը փաստացի անկախ է եղել, 30 տարի Արցախի բնակչությունն աճել է, 30 տարի Արցախի հարցը եղել է աշխարհում բոլորի մտահոգության առարկան, ձեր իշխանության ժամանակ տապալել եք դա, կործանել եք Արցախը, բանակն եք թուլացրել, անվտանգությունն եք ոչնչացրել, հիմա եկել ում՝ ինչի համար եք մեղադրում»,- Վլադիմիր Վարդանյանին պատասխանեց նա:
Մանրամասները՝ տեսանյութում
Արծվիկ Մինասյանը իշխանությանը կոչ արեց՝ հեռանալ: Ի պատասխան Ալեն Սիմոնյանը հիշեցրեց՝ ընտրություններ են եղել, ժողովուրդն իրենց ընտրել է. «Մեռանք հեռանալով, տարին մեկ հեռանում ենք»:
Նելլի ԳՐԻԳՈՐՅԱՆ
