«Իրավիճակը գնալով ահագնանում է, եւ Ադրբեջանի նման պահվածքը, բնականաբար, պետք է հանգեցներ զոհերի»,- «Հայելի» ակումբում անդրադառնալով ադրբեջանական կողմի՝ Բերձորի միջանցքը փակ պահելու պատճառով Արցախում բուժօգնության կարիք ունեցող ծանր հիվանդներից մեկի մահանալուն, ասաց լեզվաբան Նարինե Դիլբարյանը
«Ամբողջ խնդիրն այն է, որ Ադրբեջանն է հեղեղել լրատվական դաշտը, մեզ շրջափակել է ոչ միայն ռազմական ուժով եւ մնացյալ կառույցներով, այլեւ տեղեկատվական շրջափակում է ստեղծել։ Նրանց՝ աղավնի սպանող բնապահպաններին արդեն փոխարինում է երիտասարդությունը, իրենք տեխնոլոգիապես գործում են շատ ճիշտ։ Հիմա մենք եւս պետք է գործի դնենք տեղեկատվական, քարոզչական, բանակցային եւ ինչու չէ՝ նաեւ ռազմաքաղաքական բոլոր հնարները, որպեսզի աշխարհին հայտնենք, թե ինչ է իրականում տեղի ունենում, որպեսզի մերկապարանոց խոսքերից բացի, որ կոչ ենք անում Ադրբեջանին ապաշրջափակել, տեղի ունենան կոնկրետ գործողություններ։
Ըստ էության, մենք տեսանք, որ Մարդու իրավունքների եվրոպական դատարանի հետ կապված՝ Ադրբեջանը ձգձգում է իր նյութերը ներկայացնել, եւ դա նրա համար սովորական պրակտիկա է։ Անվտանգության խորհրդից եւս չկա կոնկրետ տեղեկատվություն, մինչդեռ ճշմարտության ներկայացումը պետք է դառնա մեր հիմնական զենքը։ Եվ պետք է կարողանալ բոլոր հարցերում հետեւողական լինել։
Եթե ռուս խաղաղապահները կարողանում են իրենց համար հումանիտար օգնություն բերել Արցախի շրջափակված հայկական հատված, ուրեմն պետք է այնպես անել, որ մեր հիվանդները եւս դուրս բերվեն, բայց դա, բնականաբար, չպետք է ունենա այն տեսքը, ինչ ադրբեջանական մամուլն է ներկայացնում, որ իբր իրենք բարի եւ գթասիրտ են, առաջարկում են իրենց հետ հանգիստ ապրել»,-նշեց լեզվաբանը։
Կարդացեք նաև
Նարինե Դիլբարյանն ընդգծեց․ «Մենք իրավունք չունենք հիմա որեւէ զիջում կատարելու, որովհետեւ ցանկացած զիջում կնշանակի հայտնվել թակարդում»։
Գոհար ՀԱԿՈԲՅԱՆ
