«Սիսիանի համայնքի ղեկավարից հրաժարվելու դիմում այո՛, ներկայացրել եմ, բայց դա պիտի հաստատվի ավագանու նիստում։ Գործող կարգի համաձայն, ավագանու նիստը պիտի հրավիրվի 5-օրյա ժամկետում»,-Aravot.am-ի հետ զրույցում նշեց Սիսիանի համայնքապետ Արմեն Հակոբջանյանը։ Ըստ էության, վերջինիս խոսքով՝ հնարավոր է ավագանու նիստ չհրավիրվի։ Ավագանու նիստը հրավիրվել է դեկտեմբերի 19-ին։
Հիշեցնենք, որ հոկտեմբերի 12-ին կայացած նորընտիր ավագանու առաջին նիստում չնայած համայնքի ղեկավար էր ընտրվել «Քաղաքացիական պայմանագրի» ցուցակը գլխավորող Արմեն Հակոբջանյանը, սակայն դրանից հետո երկու անգամ ավագանու նիստ է հրավիրվել, սակայն քվորում չլինելու պատճառով նիստերը չեն կայացել։ Նիստի օրակարգում մեկ հարց էր՝ նորընտիր համայնքապետի երդումը Սիսիան համայնքի բնակիչներին։
Սիսիանի ավագանու անդամի մանդատ ստացած երեք ուժերի՝ «Ապրելու երկիր», «Մեկ Հայաստան» կուսակցությունների եւ «Աշխատանք եւ Արդարություն» դաշինքի ընտրական ցուցակներում ընդգրկված բոլոր թեկնածուները բացարկի դիմումներ են ներկայացրել :
Գործող ավագանին պետք է արձանագրի Արմեն Հակոբջանյանի հրաժարականը, որից հետո պետք է նշանակվի համայնքապետի պաշտոնակատար։ Սիսիանում նաեւ նշանակվելու է ավագանու նոր ընտրություններ։ Նախատեսվում է, որ այն կկայանա եկող տարվա մարտի 23-ին։
Կարդացեք նաև
Ավելացնենք, որ Արմեն Հակոբջանյանը Ջերմուկում էր՝ մասնակցելու վարչապետի հետ հանդիպմանը։ Հիշեցնենք, կառավարող ուժի ակտիվը դեկտեմբերի 17-ին հավաքվելու է Ջերմուկում։
Արմեն ԴԱՎԹՅԱՆ
