Ինչպես արդեն տեղեկացրել էինք, «Ազատություն Բերձորի միջանցքին», «Արցախ, Սփյուռք, Հայաստան» վանկարկումներով եւ «Դադարեցրեք մարդկության դեմ ուղղված հանցագործությունը», «Բացեք հույսի ճանապարհը», «Դադարեցրեք նոր ցեղասպանությունը» պաստառներով եւ պահանջներով, հայաստանցի ուսանողներն այսօր էլ քայլերթ կատարեցին Երեւանի փողոցներում: Նախատեսվում էր այդ պահանջները ամփոփող նամակ փոխանցել նաեւ Հայաստանում Եվրամիության գրասենյակ: ԵՄ գրասենյակում, սակայն, հայ ուսանողներին չէին սպասում: Նրանց հետ զրուցելու, պահանջ-բողոքը լսելու համար, գրասենյակից ոչ ոք չմոտեցավ ուսանողներին:
«Մենք պնդում ենք, որ ձեր արձագանքը տաք ստեղծված իրավիճակի մասին: Եթե չեք կարողանում խոսել, ինձ մոտ կարծիք է ձեւավորվում, որ համր եք: Մենք պահանջում ենք, որ հարյուրհազարավոր արցախցիներ դուրս գան շրջափակումից: Կատարեք մեր պահանջները»,- հայտարարեցին ուսանողները՝ հավելելով, որ իրենք գիտեն, որ հարցի շահառուն ԵՄ-ն չէ, սակայն վստահ են, որ ԵՄ-ն ունի ռեսուրս՝ Ադրբեջանին ճնշելու եւ Արցախն ազատելու հումանիտար ճգնաժամից: ԵՄ գրասենյակի աշխատակիցների դուրս գալը, իրենց հետ խոսելը եւ պահանջներին ծանոթանալը, ուսանողները համարում են զուտ հարգանք ՀՀ եւ Արցախի բնակչության նկատմամբ:
«Մենք չենք հանձնելու հողը, որի համար շատ թանկ գին ենք վճարել»,- ԵՄ գրասենյակի մոտ, իրենց ելույթներում ասացին ուսանողները:
Կարդացեք նաև
Ուսանողները Արցախի հիմնը երգեցին ԵՄ գրասենյակի մոտ եւ երթով շարժվեցին դեպի ՀՀ-ում Ֆրանսիայի դեսպանատուն:
Նելլի ԳՐԻԳՈՐՅԱՆ
