«Մեծ աշխատանք է տարվում՝ Բերձորի միջանցքի բացման ուղղությամբ՝ բոլոր հնարավոր խողովակներով։ Կարծում եմ՝ բացվելու հնարավորություն կա, հույս ունենք»,-խորհրդարանում լրագրողների հետ ճեպազրույցում այսօր ասաց Արցախի ԱԳ նախարարի պաշտոնակատար Դավիթ Բաբայանը՝ անդրադառնալով տեղեկություններին, որ Բերձորի միջանցքը հնարավոր է՝ շուտով բացվի։
«Բայց հասկանանք, որ նման ահաբեկչական գործողությունները կարող են լինել շարունակական։ Նախապայմաններ չկան։ Փակումն ինքնին կոպիտ խախտում է։ Եթե չլիներ ՌԴ խաղաղապահ առաքելությունը, Արցախը վաղուց կործանված էր, բայց ներուժը պետք է ավելանա։ Մեր առաջարկն այն է, որ խաղաղապահներին տրվի միջազգային մանդատ, որպեսզի կարողանան խաղաղություն պարտադրել, ինչպես Կոսովոյում է»,-շեշտեց Դավիթ Բաբայանը։
Նա նաեւ հաստատեց տեղեկությունները, որ ՌԴ խաղաղապահները մարդասիրական օգնություն են հասցրել Հին Շենին եւ Մեծ Շենին, սակայն Արցախի մնացած մասը շարունակում է շրջափակված մնալ։
Լուիզա ՍՈՒՔԻԱՍՅԱՆ
