ՊԵԿ նախագահ Ռուստամ Բադասյանն ԱԺ-ում ներկայացրեց «Հարկային օրենսգրքում» փոփոխությունների նախագիծ, որով առաջարկվում է էլեկտրոնային առեւտրի հստակ կանոնակարգումներ մտցնել: Օրինակ, երբ ԵԱՏՄ տարածքում էլեկտրոնային հարթակներից առեւտուր ենք անում ու ապրանքը ձեռք է բերվում ռեզիդենտ ֆիզիկական անձանց կողմից, ավելացված արժեքի հարկը պետք է հաշվարկվի եւ վճարվի ՀՀ-ում՝ անկախ նրանից մշտական հաստատություն ՀՀ-ում առկա՞ է, թե՞ ոչ: Սրա արդյունքում նախատեսվում է բյուջեի եկամուտներն ավելացնել: Բելառուսն ու Ղազախստանը նման կանոնակարգում ունեն:
Երկրորդ կանոնակարգումը ավտոմեքենաների օտարման գործարքների հետ է կապված: Երբ մեքենան օտարում ենք, եկամտային հարկի փոխարեն կսահմանվի պետական տուրք, եւ դրա գանձումը կվերապահվի ՀՀ ոստիկանությանը: Գործող կարգավորմամբ որոշ մարդիկ չեն իմանում, որ մեքենան վաճառելիս պետք է հարկ վճարեն, մի մասը վճարում է, մյուս մասը՝ ոչ ու անհավասարություն է առաջանում: Հիմա պետական տուրքը հաշվարկվելու է ավտոմեքենայի շարժիչի յուրաքանչյուր ձիաուժ հզորության համար 150 դրամ:
Էլեկտրոնային առեւտրի հետ կապված ՔՊ պատգամավոր Սիսակ Գաբրիելյանը ճշտեց՝ ստացվում է, որ հիմա օնլայն գնում կատարելիս պիտի քաղաքացին ԱԱՀ վճարի՞՝ Բադասյանը պատասխանեց, որ ֆիզիկական քաղաքացիների համար որեւէ բեռ չի սահմանվում: ԱԱՀ վճարելու պարտականություն ունենալու է էլեկտրոնային հարթակը, որը գործում է ոչ ռեզիդենտ գոտում՝ ԵԱՏՄ տարածքում: Օրինակ, ՌԴ-ում գործող էլեկտրոնային հարթակները պետք է ՀՀ-ից կատարվող գնումների դեպքում ԱԱՀ վճարեն ՀՀ պետբյուջե:
Հռիփսիմե ՋԵԲԵՋՅԱՆ
