Yerkir.am-ը գրել էր, որ որպես ԿԳՄՍ փոխնախարար Ժաննա Անդրեասյանի վերջին հրահանգը դպրոցներին ուղղված է եղել հայկական բանակի դեմ, եւ որ մարզպետարաններին ուղարկած ու դեկտեմբերի 13-ին թվագրվող իր շրջաբերականում նա հրահանգել է որևէ կերպ աջակցություն եւ տարածք չտրամադրել ռազմականացված կառույցներին, չօգնել բանակի հետ կապ ունեցողներին, քանի որ Հայաստանը միացել է «Անվտանգ դպրոցներ» հռչակագրին։
Aravot.am-ը թեմայի վերաբերյալ մեկնաբանություն խնդրեց ԿԳՄՍ նախարարությունից։ ԿԳՄՍ նախարարի մամուլի քարտուղար Գեղամ Մելիքբեկյանը հետեւյալը փոխանցեց․ «Ժաննա Անդրեասյանի՝ նախարարի պաշտոնում նշանակվելուց հետո «Անվտանգ դպրոցներ» միջազգային հռչակագրի վերաբերյալ որևէ շրջաբերական գրություն ՀՀ հանրակրթական դպրոցներին չի ուղարկվել: Ի դեպ, նախարարն ի պաշտոնե շրջաբերական չի ուղարկում: Ժաննա Անդրեասյանը գրությունը ստորագրել է դեռևս որպես ոլորտը համակարգող նախարարի տեղակալ:
Համապատասխան գրություն մարզպետարաններին, Երևանի քաղաքապետարանին և ԿԳՄՍՆ ենթակա դպրոցներին ուղարկվել է հիշյալ հռչակագրի պահանջների ապահովման անհրաժեշտությամբ պայմանավորված, այն է՝ կրթական հաստատությունները զերծ պահել թիրախավորումից: ՀՀ-ն «Անվտանգ դպրոցներ» միջազգային հռչակագիրը վավերացրել է դեռևս 2017 թվականին՝ դառնալով միջազգային մարդասիրական այդ փաստաթղթին միացող 60-րդ երկիրը: Ներկայում հռչակագրին միացել է 115 պետություն:
Լուրջ մտահոգություն է առաջացնում այն, որ Ադրբեջանը հրաժարվում է վավերացնել «Անվտանգ դպրոցներ» հռչակագիրը՝ այդպիսով խաթարելով համաշխարհային կոալիցիայի՝ զինված բախումների ընթացքում կրթության ոլորտը նպատակային հարձակումներից զերծ պահելու ջանքերը: Ընդ որում՝ 44-օրյա պատերազմի ընթացքում Ադրբեջանն իր հենակետերը տեղադրում էր նաև կրթական հաստատությունների հարևանությամբ՝ հետագայում հայկական կողմի հասցեին մեղադրանքներ հնչեցնելու համար»։
Կարդացեք նաև
Գոհար ՀԱԿՈԲՅԱՆ
