Ռուսաստանը մտահոգված է Լաչինի միջանցքի արգելափակմամբ և ակնկալում է, որ դրանով լիարժեք տրանսպորտային հաղորդակցությունը կվերականգնվի առաջիկայում: Այս մասին հայտարարել է Ռուսաստանի ԱԳՆ պաշտոնական ներկայացուցիչ Մարիա Զախարովան:
«Մենք մտահոգված ենք Լաչինի միջանցքի արգելափակմամբ, որը պայմանավորված է հանքավայրերի շահագործման հարցում կողմերի տարաձայնություններով: Ռուսաստանի ՊՆ-ն և ռուս խաղաղապահ զորամիավորումն այս օրերին ակտիվորեն աշխատում են իրավիճակն ապաէսկալացնելու ուղղությամբ: Մենք ակնկալում ենք, որ ամենամոտ ժամանակում կվերականգնվի լիարժեք տրանսպորտային հաղորդակցությունը»,- ասել է Զախարովան:
Նա ընդգծել է, որ Լաչինի միջանցքը, որն ապահովում է կապը Լեռնային Ղարաբաղի և Հայաստանի միջև, գտնվում է ռուս խաղաղապահների լիարժեք հսկողության տակ, և 2020թ. նոյեմբերի 9-ի եռակողմ համաձայնագիրը ստորագրելիս «կողմերը ստանձնել են պարտավորություններ, որոնց պետք է անշեղորեն հետևել»:
«Անընդունելի է խնդիրներ ստեղծել քաղաքացիական բնակչության կենսագործունեության համար»,- ասել է Զախարովան:
Կարդացեք նաև
Նա նաև «առանձին մեկնաբանել է» ռուս խաղաղապահների նկատմամբ «սադրիչ գործողությունները և մեղադրանքները»: «Որտեղից էլ որ դրանք գան, մենք դրանք համարում ենք անթույլատրելի և ոչ կառուցողական: Ռուս խաղաղապահ զորամիավորումը արդյունավետ կերպով կատարում է իր առաջադրանքները՝ հանդես գալով տարածաշրջանում կայունության երաշխիք»,- ասել է նա:
Պատրաստեց Վիկտորյա ԱՆԴՐԵԱՍՅԱՆԸ
