«Պետական պաշտոններ եւ պետական ծառայության պաշտոններ զբաղեցնող անձանց վարձատրության մասին» օրենքում լրացումներով առաջարկվում է կարգավորել ԲԴԽ անդամների պաշտոնային դրույքաչափի նկատմամբ սահմանվող հավելավճարներին առնչվող հարցը: Բարձրագույն դատական խորհրդի անդամների վարձատրության հարցում հավասարություն կլինի անկախ այն հանգամանքից՝ վերջինս ընտրված է Դատավորների ընդանուր ժողովի կողմից, թե Ազգային ժողովի:
ՀՀ արդարադատության նախարարի տեղակալ Արմենուհի Հարությունյանը նշել է, որ Դատական օրենսգրքով Բարձրագույն դատական խորհրդի անդամի վարձատրությունը սահմանվում է օրենքով եւ չի կարող պակաս լինել Վճռաբեկ դատարանի դատավորի վարձատրությունից: Սակայն, Դատական օրենսգրքով սահմանված կարգավորումներն արտացոլված չեն օրենքում: Արմենուհի Հարությունյանի խոսքով Վճռաբեկ դատարանի նախագահին, Վճռաբեկ դատարանի պալատի նախագահին օրենքով սահմանված կարգով տրամադրվում է պաշտոնային դրույքաչափի 50 տոկոսի չափով հավելում, ինչը ԲԴԽ նախագահի անդամի դեպքում չի գործում:
Առաջին ընթերցումից հետո առաջարկներ չեն եղել:
Հարցը քննարկվել է ԱԺ պետական-իրավական հարցերի մշտական հանձնաժողովի դեկտեմբերի 15-ի արտահերթ նիստում:
Կարդացեք նաև
Հանձնաժողովի նախագահ Վլադիմիր Վարդանյանը հստակեցրել է, որ նախագծի նպատակն է ապահովել միեւնույն մարմնում աշխատող սուբյեկտների կարգավիճակային իրավահավասարությունը, ինչպես նաեւ վարձատրության մասով հավասարությունը:
Նախագիծն արժանացել է հանձնաժողովի դրական եզրակացությանը:
Հանձնաժողովի նախագահ Վլադիմիր Վարդանյանը փոփոխություններ է առաջարկել ՀՀ քրեական դատավարության օրենսգրքում: Նախատեսվում է միջդատական վարույթի մասով քրեական էլեկտրոնային ինստիտուտի գործողության մեջ դնելու ժամկետը մեկ տարով հետաձգել: Ըստ հեղինակի՝ դա հնարավորություն կտա համակարգի երկարաժամկետ, կոնկրետ քրեական վարույթներով պիլոտային փորձարկման միջոցով վեր հանել եւ շտկել բոլոր հնարավոր թերությունները, լուծել համակարգի անվտանգ շահագործման հարցերը՝ հետագա բացասական հետեւանքներից խուսափելու նպատակով: Նախագծով առաջարկվում է հետաձգել նաեւ հակակոռուպցիոն կոմիտեի ձեւավորման փուլում մինչեւ 2024 թ. հունվարի 1-ն առկա եւ քննվող գործերի հակակոռուպցիոն հավելվածում առկա գործերի քննությունը: Վլադիմիր Վարդանյանը հույս է հայտնել, որ այդ ժամանակահատվածում ամբողջությամբ կվերազինվի Հակակոռուպցիոն կոմիտեն եւ կավարտվեն էլեկտրոնային քրեական վարույթի հետ կապված ապրոբացիայի աշխատանքները:
Կառավարության դրական տեսակետը ներկայացրել է ՀՀ արդարադատության նախարարի տեղակալ Արփինե Սարգսյանը:
Հարցն արժանացել է հանձնաժողովի դրական եզրակացությանը:
ԱԺ
