«Որեւէ մեկն իրավունք չունի սա դիտարկել որպես մեկուսի, միայն Արցախի դեմ ուղղված քայլ։ Սա նաեւ ՀՀ-ի, հայկականության դեմ է ուղղված, որովհետեւ նույն գործողությունները եղել են նաեւ ՀՀ-ի հանդեպ՝ ճանապարհների փակում, վերահսկողություն ՀԷԿ-երի, պոչամբարների հանդեպ։ Նույն խախտումներն են։ Հետեւաբար, հարցն իրավունք չունենք մեկուսի դիտարկելու»,-ՄԱԿ-ի երեւանյան գրասենյակի առաջ այսօր լրագրողների հետ զրույցում անդրադառնալով Բերձորի միջանցքն Ադրբեջանի կողմից փակելու փաստին՝ ասաց Իրավունքի և արդարության կենտրոն «Թաթոյան» հիմնադրամի տնօրեն, ՀՀ մարդու իրավունքների նախկին պաշտպան Արման Թաթոյանը։
Մեկնաբանելով դեպքի վայրում աղավնիները ձեռքերին համատեղ ապրելու ադրբեջանցիների կոչերը՝ Արման Թաթոյանը շեշտեց, որ Ադրբեջանի դեպքում վերջինս շարունակում է ատելության քաղաքականությունը հայերի հանդեպ, հայասպանությունն ու հայատյացությունը, եւ պատերազմից հետո մինչեւ օրս որեւէ արարքի համար չի պատժվել․ «30-40 տարեկան ադրբեջանցիները դաստիարակվել են հայատյացության ոգով։ Անգամ նրանց հեքիաթներում հայը մշտապես բացասական կերպար է, որն իրենց սպանում է։ Հիմա Ադրբեջանի իշխանությունը խրախուսում է ցանկացածի, որը հայ կսպանի կամ կվնասի։ Նրանց մշակույթի, քաղաքական գործիչները խրախուսում են հայի սպանությունը։ Այստեղ է մեխը․ նման պայմաններում նրանց հետ բացառվում է համատեղ գոյակցություն։ Նրանք ոչնչացնում են եւ բնաջնջում»։
Հարցին՝ վերջիվերջո, ո՞վ ունի մանդատ՝ ադրբեջանցիներին այդտեղից դուրս բերելու, Արման Թաթոյանը պատասխանեց․ «Բոլոր միջոցները պետք է ձեռնարկել։ Դրա համար ՄԱԿ-ի անվտանգության խորհրդի մշտական անդամ երկրների համար որոշակի ցույցեր ենք նախատեսում՝ ասելու համար, որ մարդկանց կյանքի, գոյաբանական հարց կա»։
Մեկ այլ հարցի՝ բացի ուժային տարբերակից, այլ կերպ ինչպե՞ս հեռացնել ադրբեջանցիներին այդտեղից, Արման Թաթոյանը պատասխանեց․ «Լավագույն լուծումը կլինի այնպես անել, որ նրանք այլեւս չմոտենան այդ հատվածներին։ Հակառակ դեպքում անընդհատ կարող են փորձել տեռորի ենթարկել։ Ամեն միջոց պետք է գործադրել, այլ տարբերակ չկա։ Այդ հատվածն այսպես կոչված միջանցք է, որի որոշ հատվածներում զինվորականներ չկան, դրա համար էլ եկել են։ Վստահ եմ, որ պետական ավտոբուսներով են եկել՝ վճարվող, կազմակերպված։ Մենք նման տվյալներ ունենք։ Անվտանգության երկարաժամկետ երաշխիքներ են պետք»։
Կարդացեք նաև
Լուիզա ՍՈՒՔԻԱՍՅԱՆ
