Կառավարության առջեւ ՀՀԿ-ի հրավիրած՝ ի պաշտպանություն Արցախի եւ արցախահայության հանրահավաքից հետո մասնակիցները որոշել էին մոմեր վառել Հանրապետության հրապարակում տեղադրված տոնածառի մոտ:
Ոստիկանությունն արդեն ցերեկվանից շրջափակել էր տոնածառը, թեեւ ավելի ուշ հայտնի դարձավ, որ այդ մասին նախապես տեղեկացվել էր: Երբ հանրահավաքի մասնակիցները մոտեցան տոնածառին, նրանց ոստիկանությունը առաջարկեց մոմավառությունն իրականացնել «գորգի» տարածքում, բայց տոնածառից որոշակի հեռավորության վրա: Արմեն Աշոտյանը եւ Էդուարդ Շարմազանովը փոխոստիկանապետերի եւ բարձրաստիճան սպաների հետ սկսեցին բանակցել, որպեսզի ավելորդ արհեստական անհարմարություններ չստեղծվեն եւ հնարավորություն տրվի մոմերը վառել տոնածառին հնարավորինս մոտ: Մի որոշ ժամանակ անց կողմերը եկան փոխզիջումային տարբերակի:
Բանակցությունների ընթացքում փոխոստիկանապետ Արամ Հովհաննիսյանը հեռախոսով ինչ-որ բան էր ցույց տալիս Արմեն Աշոտյանին: Aravot.am-ը պարոն Հովհաննիսյանից հետաքրքրվեց, թե ի՞նչ էր ցույց տալիս Աշոտյանին ու բացատրում: Պարզվեց, որ համացանցում ինչ-որ մեկը գրառում էր կատարել՝ սպառնալով վնասել կամ այրել տոնածառը:
Տեղեկացնենք, որ փոխզիջումային տարբերակը հնարավոր եղավ, երբ հանրահավաքի ու մոմավառության կազմակերպիչները անձնական պատասխանատվություն ստանձնեցին, որ միջադեպեր չեն լինի:
Կարդացեք նաև
Աշոտ ՀԱԿՈԲՅԱՆ
