Դժբախտ պատահարներն ու սպորտային վնասվածքները մեջքի խրոնիկական ցավերի տարածված պատճառներից են։ Սակայն երբեմն անգամ ամենահասարակ շարժումները, օրինակ գետնից մի բան վերցնելը, կարող են մեջքի ցավի առաջացմանը նպաստել։
Մեջքի ցավերի առաջացման այլ գործոններն են՝ սխալ կեցվածքը, ֆիզիկական վատ վիճակը՝ պայմանավորված պասիվ կենսակերպով, ներքին օրգանների հիվանդությունները, օրինակ՝ երիկամներում քարերը, ինֆեկցիաները, թրոմբները, ճարպակալումը, սթրեսը, օստեոպորոզը կամ ոսկրային զանգվածի կորուստը։
Մեջքի խրոնիկական ցավեր ունեցող մարդիկ սովորաբար նստակյաց կենսակերպ են վարում։ Մեջքի, պարանոցի ու մկանային ցավերի մեծ մասը կապված են մարմնում ծանրության անհամաչափ բաշխմամբ, որն առաջանում է երկար ժամանակամիջոցում ոչ բնական վիճակում գտնվելու հետևանքով։
Կարդացեք նաև
Տևական ժամանակ նստած մնալն ու սխալ կեցվածքը մեջքի ցավերի առաջացման, ճարպակալման, հոդերի, նյարդերի հետ կապված խնդիրների և այլ հիվանդությունների զարգացման պատճառ են։ Իսկ հետազոտությունները փաստում են, որ երկար ժամանակ նստած մնալն ինքնին առողջության վատթարացման գործոն է։
Ավելի շատ են ապացույցները, որ հոգեբանական ու էմոցիոնալ խնդիրները կարող են սրել ինչպես մեջքի, այնպես էլ այլ բնույթի ցավերը։
էմոցիոնալ խորը խնդիրներն ու չլուծված հարցերը մեծ ազդեցություն ունեն ֆիզիկական ցավի վրա։ 2004 թ․-ին անցկացված ուսումնասիրությունը հաստատում է այդ տեսությունը։ Հետազոտողները 4 տարվա ընթացքում ուսումնասիրել են 100 պացիենտի, որոնցից հոգեբանական խնդիրների առումով ամենախոցելիները հետազոտության ավարտին 3 անգամ ավելի հաճախ են հայտնել մեջքի ցավերի մասին։
Ինչպես և ցանկացած հիվանդության պարագայում, այնպես էլ այս դեպքում ցավը կանխարգելելն ավելի հեշտ է, քան բուժելը։ Մեջքի խրոնիկական ցավից խուսափելու փորձեք հետևել այս պարզ խորհուրդներին․
1․Միշտ ձգող վարժություններ կատարեք ֆիզիկական լարված գործունեություն իրականացնելուց առաջ։ Իսկ առհասարակ կանոնավոր կերպով ֆիզիկական վարժություններ կատարեք, որոնք կօգնեն ամրացնել ողնաշարի մկանները, ինչը նշանակալիորեն կթեթևացնի մեջքի ցավերը։
2․Նստած կամ կանգնած ժամանակ մի կորացեք։
3․Եթե ստիպված եք երկար ժամանակ նստած մնալ, փորձեք ուշադիր լինել ձեր դիրքին։ Նստեք՝ մի փոքր ներս քաշելով որովայնն ու գլուխն ուղիղ պահելով, այլ ոչ թե կախելով, ուսերը նույնպես ուղիղ պահեք՝ կարծես փորձելով միացնել թիակները։ Այդ դիրքն օգնում է ուղղել ողնաշարը։
4․Աշխատանքային աթոռն ու մեքենայի նստատեղը պետք է ունենա գոտկատեղը լավ պահող հենարան։
5․Հաճախ փոխեք մարմնի դիրքը՝ ժամանակ առ ժամանակ քայլելով կամ ձգվելով։ Եթե ստիպված եք երկար ժամանակ նստած մնալ, ապա ամեն ժամը մեկ 10 րոպեով ընդմիջում արեք քայլելու, կանգնելու, ձգվելու համար։
6․ Թեքվելիս կամ կռանալիս ուշադիր եղեք մեջքին։
7․Կրեք հարմարավետ կոշիկներ։
8․Քնեք կողքի վրա՝ ողնաշարի կորացումը նվազեցնելու համար:
9․Փորձեք օպտիմալացնել վիտամին D-ի մակարդակն օրգանիզմում։
10․Բավականաչափ հեղուկ օգտագործեք։
Պատրաստեց Մարինե ԱԼԵՔՍԱՆՅԱՆԸ
