«Գնայի հասնեի այնտե՞ղ, այստեղ մենք որոշում ենք կայացնում, ես գնամ հասնեմ այնտե՞ղ. 90-ական թվականներից երեք անգամ գնացել հասել եմ այնտեղ, ես իմ ներդրումը արել եմ այնքան, որ չեք էլ պատկերացնում»,- այսօր խորհրդարանում լրագրողների հետ զրույցում ասաց իշխող խմբակցության պատգամավոր Հակոբ Ասլանյանը՝ անդրադառնալով հարցին, թե որպես իշխանական պատգամավոր՝ ինչո՞ւ չի գնացել Արցախի շրջափակված հատված՝ տեղում իրավիճակը գնահատելու: Նա կարծում է, որ ԱԺ-ն իր գործն անում է եւ հայտարարություն կանի Լաչինի միջանցքի՝ ավելի քան 48 ժամ փակ լինելու առիթով, մնացյալ հարցերն ու քայլերն, ըստ իշխող ուժի պատգամավորի, կառավարությունը կանի: Լրագրողի դիտարկմանը՝ արդեն երրորդ օրն է՝ մարդիկ շրջափակման մեջ են, ԱԺ հայտարարությունը բավարա՞ր քայլ է, Հակոբ Ասլանյանը պատասխանեց. «Քաղաքական հարցերն այդքան արագ չեն լուծվում»:
Անդրադառնալով ռուս խաղաղապահների գործողություններին եւ նրանց կողմից ուժ կիրառելու հնարավորություններին, իշխանական պատգամավորն ասաց, որ խաղաղապահներն ուժ կիրառելու մանդատ չունեն. «Այո, ես հասկանում եմ, որ Արցախի ժողովուրդը այսօր շատ լուրջ խնդիրների առաջ է կանգնել, այդ խնդիրները մենակ իրենցը չեն, մերն էլ են, հիմա մենք ունենք այդպիսի սրիկա հարևաններ։ Մտածել, որ այդ խնդիրները միայն այսօր են, ուղղակիորեն մանիպուլյացիա է, մենք այդ հարեւանների հետ խնդիրներ ունենք արդեն մի քանի հարյուր տարի: Խաղաղապահներն իրավունք ունեն ուժ կիրառելու, եթե ադրբեջանցիները կրակելով գային, բայց նրանք կրակելով չեն գալիս: Եթե մարդը կրակելով չի գալիս, դու չես կարող կրակել նրան»: Իր գնահատմամբ, խնդիրը կարող է լուծվել բանակցությունների միջոցով։
Պատասխանելով հարցին՝ մի՞թե ադրբեջանցիների խումբը օրենքով է եկել փակել Լաչինի միջանցքը, որ նրանց նկատմամբ օրենքի շրջանակներում պետք է հայկական կողմը գործողություններ իրականացնի, ՔՊ-ական պատգամավորն ասաց. «Էդ ի՞նչ պրովոկացիոն հարցեր եք տալիս։ Ես ասացի՝ մենք օրենքով ենք անելու։ Ես ասացի՝ թուրքը օրենքո՞վ է արել։ Մենք չգիտե՞նք, որ թուրքը օրենքով չէ, մենք չգիտե՞նք թուրքին»։
Դիտարկմանն էլ, որ իշխանությունը խոսում է խաղաղության դարաշրջանի բացման մասին, այդ նույն թուրքի հետ, նա արձագանքեց. «Մի՞թե հնարավոր է դարեդար թշնամական վիճակի մեջ ապրել: «Խաղաղության դարաշրջան» ասելով՝ ինչ եք հասկանում։ Մի՞թե հնարավոր է դարեդար ապրել թշնամական վիճակի մեջ։ Ի վերջո, մենք պետք է կարողանանք գտել այն միջին նորմալ վիճակը, երբ մեր ժողովուրդը կկարողանա խաղաղ ապրել»։
Կարդացեք նաև
Անդրադառնալով ընդդիմության այն առաջարկին, որ անհրաժեշտ է ԱԺ-ում ընդունել հայտարարություն, որով կընդգծվի, որ Արցախը երբեք չի լինելու Ադրբեջանի կազմում, Հակոբ Ասլանյանն ասաց․ «Եթե ընդդիմությունը այնքան շատ է սիրում Արցախը, թող գնա էնտեղ, Արցախը պաշտպանի: Իշխանությունն անում է իր ձեռքից եկած ամեն ինչ, սա դիվանագիտություն է։ Երբ դու խոսում ես տարածքի մասին, ամբողջ միջազգային հանրությունը քեզ թիկունք չի կանգնում, իսկ երբ խոսում ես ժողովրդի իրավունքներից, դա արդեն ուրիշ է: Մինչեւ հիմա դուք չեք հասկանում, որ մեր պարտությունը սկսվել է 1994 թվականից, երբ մենք սխալ ձեւով գնացինք եւ սկսեցինք խոսել տարածքի մասին: Փաստացի պարտությունը սկսվել է 1994-ից, երբ Հայաստանը ստորագրել է այդ փաստաթղթի տակ, փոխանակ պահանջեինք, որ միայն Արցախը ստորագրեր։ Երբ Հայաստանը ստորագրեց 1994 թվականի հրադադարի փաստաթղթի տակ, միջազգային հանրությանը հանեց իր դեմ և մեզ կպցրեցին ագրեսորի պիտակ»:
Նելլի ԳՐԻԳՈՐՅԱՆ
