Թուրքիան շարունակում է պայքարը սեփական առաջնահերթությունների եւ ապագայի համար՝ այնպես, ինչպես դա արել է մեկ դար առաջ։ Այս մասին, թուրքական «Անադոլու» գործակալության հաղորդմամբ, դեկտեմբերի տասին հայտարարել է Թուրքիայի նախագահ Ռեջեփ Թայիփ Էրդողանը։ Նա շեշտել է, որ ժամանակակից Թուրքիան այն պետությունը չէ, որը կարող է կառավարվել դրսից․ «Մենք ինքներս ենք ուղղություն ցույց տալիս եւ հրամայում ուրիշներին։ Ցանկացած համաշխարհային ճգնաժամ թույլ է տալիս ավելի լավ գիտակցել Թուրքիայի ուժը։ Թուրքիան դարձել է մի պետություն, որի գործողություններին հետեւում են ողջ աշխարհում»։
Ապա Էրդողանն ուշադրություն է հրավիրել Թուրքիայի միջնորդական ջանքերին տարածաշրջանում, այդ թվում՝ Ուկրաինայի առնչությամբ։ Նա հայտնել է, որ այսօր հեռախոսազրույց է ունենալու ՌԴ նախագահ Վլադիմիր Պուտինի, այնուհետեւ՝ Ուկրաինայի նախագահ Վլադիմիր Զելենսկու հետ։ «Քննարկելու ենք հետագա քայլերը տարածաշրջանում»,-հավելել է Էրդողանը, նաեւ հիշեցրել, որ հենց Թուրքիայի ջանքերով է բացվել «հացահատիկի միջանցքը», ինչը թույլ է տվել գյուղմթերքի փոխադրումը աշխարհի մի շարք ուղղություններով։
Պատրաստեց Լուիզա ՍՈՒՔԻԱՍՅԱՆԸ
