Այսօր ԱԺ նիստում արդարադատության փոխնախարար Արփինե Սարգսյանը ներկայացրեց «Կառավարության կառուցվածքի եւ գործունեության մասին» օրենքում փոփոխությունների նախագիծը, որով առաջարկվում է ստեղծել ներքին գործերի նախարարություն:
Նախարարությունը ներառելու է ոստիկանությունը, փրկարար ծառայությունը եւ միգրացիայի ու քաղաքացիության ծառայությունները: 5 հիմնական գործառութային ոլորտ է առանձնացվում՝ հասարակական կարգի պահպանություն, հանցագործությունների կանխում եւ բացահայտում, աղետների ռիսկի կառավարում, որը գալիս է ԱԻՆ-ի բլոկից, միգրացիա եւ քաղաքացիություն, պետական ռեզերվների կառավարում եւ հումանիտար հարցեր:
«Հայաստան» խմբակցության պատգամավոր Գեղամ Նազարյանն իր ելույթում հորդորեց ամեն հարց քննարկելիս մտածել՝ ի՞նչ կասեին զոհված հերոս տղերքը, կողջունեի՞ն, թե՞ չէին ողջունի. «Ամեն քայլ անելուց պետք է հիշել ու հարգել այն տղերքին, որոնք զոհվեցին այս երկրի համար, այդ տղերքը զոհվելու համար չէին: Երբ խոսում եք անցյալից, անցյալի բացթողումներից, նախարարներից, մշտապես հիշեք, թե ով էր երկիրը ղեկավարում, ով էր իշխանության ղեկին, երբ մեր տուն եկավ պատերազմը, արհավիրքն ու աղետը: Մի՛ շահարկեք, մի՛ օգտագործեք զոհված տղերքին եւ նրանց ընտանիքներին: Այս կոչս վերաբերվում է բոլորին, սկսած վարչապետի ընտանիքից, լրջացե՛ք»:
Հռիփսիմե ՋԵԲԵՋՅԱՆ
