Այսօր ԱԺ նիստում քննարկվում էր «Կառավարության կառուցվածքի եւ գործունեության մասին» օրենքում փոփոխությունների նախագիծը, որով առաջարկվում է ստեղծել ներքին գործերի նախարարություն: Ընդդիմադիրները կասկածներ հայտնեցին, թե ՔՊ-ն բարեփոխում է անում: Հիշեցրին, թե ինչ բռնություններ է գործադրել ոստիկանությունը քաղաքացիների նկատմամբ, ինչպես են կեղեքել ոստիկանական բաժիններում:
ՔՊ պատգամավոր Արփի Դավոյանն իր ելույթում արձագանքեց նրանց. «Ոստիկանական վայրագություններ, կեղեքումներ, անընդհատ նմանատիպ մակդիրներ եք օգտագործում: Էդ ո՞վ է ում կեղեքել, ախր չե՞ք ամաչում: Որ տարիներով հետ դառնանք ու տեսնենք իրականում ոստիկանությունը ոնց էր կեղեքում, հաստատ մենք ավելի շահեկան դիրքերում կլինենք: Անընդհատ շահարկելով, շահարկելով… Որեւէ մեկը չեկավ ու այս ամբիոնից չասեց, որ գլուխ է խոնարհում այն ոստիկան տղաների առջեւ, որոնք հայրենիքի պաշտպանության համար զոհվել են: Որեւէ մեկդ դա չհիշեցիք, մենակ հիշեցիք, որ ոստիկանները 2018 թվից այս կողմ…ի՞նչ է եղել 18 թվից այս կողմ, մի հատ 18 թվից այն կողմը նայեք՝ փշալարերով պատել էիք երկիրը: Ալեն Սիմոնյանը Մարտի 1-ը հիշեց, բայց ինչի՞ մենակ Մարտի 1: Էն, որ Սարի թաղում մարդու աչք էիք հանում, էդ լա՞վ էր, չե՛ք հիշում: Կեղեքե՜լ, վայրագություննե՜ր, գնացին, ծեծեցի՜ն, ջարդեցի՜ն: Դո՛ւք էիք հարձակվում ոստիկանների վրա, այդ մարդիկ ինչքան կարողանում էին՝ իրենց կոռեկտ էին պահում: Որ ԱԺ պատգամավորը ոստիկանի գլխից գլխարկը պոկում էր, հետո հարձակվում էիք վրան, վազվզում էիք, ինչ-որ բաներ էիք անում, ոստիկանները եթե համարժեք ուժ կիրառեին, գալու էիք այստեղ ասեիք՝ կեղեքեցին, սպանեցի՜ն: Վերջացրե՛ք: Կարեւորագույն ռեֆորմ ենք անում»:
ՔՊ պատգամավոր Վաղարշակ Հակոբյանն էլ ելույթում ասաց, թե ընդդիմադիրների ներքին մաղձը թույլ չի տալիս, որ նախագծերի բովանդակային քննարկման անցնեն:
Հռիփսիմե ՋԵԲԵՋՅԱՆ
